Tailand politsiyasi mamlakatning Pangan orolida 15-noyabr kuni o‘tkazilishi kutilayotgan to‘lin oy ziyofatida Isroil fuqarolariga qarshi ehtimoliy terakt haqida ogohlantirdi. Bu haqda Ynet nashri xabar bermoqda.
Terakt tayyorlanayotganidan xabar topgan Tailand huquq-tartibot idoralari xodimlari hushyorlikni oshirib, orol yo‘llarida to‘siqlar o‘rnatgan. Hozirda, nashrga ko‘ra, Ko-Panganda minglab isroilliklar mavjud.
Isroil xavfsizlik manbasiga ko‘ra, yahudiy hukumati tahdid haqida Tailand politsiyasi ogohlantirilishidan ancha oldin xabar topgan. Isroil Milliy xavfsizlik kengashi ikki davlat sayyohlar xavfsizligini ta’minlash uchun birgalikda ish olib borayotgani haqida bayonot bergan.
Isroil hukumati o‘z fuqarolarini ommaviy tadbirlar va gavjum joylarga borishdan tiyilishga, shuningdek, boshqa odamlar tomonidan ularga nisbatan har qanday dushmanlik ko‘rinishi haqida mahalliy huquqni muhofaza qilish organlariga xabar berishga chaqirgan.
“To‘lin oy ziyofati” isroillik sayyohlar orasida mashhur hisoblanadi. Ushbu ziyofat joriy yilning 15-noyabrida o‘tkazilishi kutilmoqda.
Isroil xavfsizlik xizmatlari tomonidan Ko-Pangandagi 10 mingdan ortiq isroilliklar uchun favqulodda protokol tez orada e’lon qilinishi qayd etilgan.
Izoh (0)