Niderlandiya hukumati 9-dekabr kuni qirollik chegarasida nazoratni joriy qiladi, bu nazorat olti oy davomida amal qiladi. De Telegraaf gazetasi xabar berishicha, bu haqda migratsiya va boshpana berish masalalari vaziri Maryolen Faber ma’lum qildi.
Uning aniqlik kiritishicha, bu vaqtinchalik chora bo‘lib, chegara hududlaridagi iqtisodiy o‘sish va harakatga imkon qadar kamroq xalaqit berishi kerak. Faberning so‘zlariga ko‘ra, yangi choralar noqonuniy migratsiyaga qarshi qaratilgan.
Vazir Yevropa komissiyasi, Yevropa ittifoqi kengashi, Yevropa parlamenti va Yevropa mamlakatlarini qaror haqida xabardor qildi.
Qayd etilishicha, chegarada nazoratni Niderlandiya qirollik harbiy politsiyasi amalga oshiradi. Vazirning so‘zlariga ko‘ra, rasmiylar vaqt o‘tishi bilan tekshiruvlar sonini ko‘paytirish niyatida.
Avvalroq Niderlandiya rasmiylari Shengen chegara kodeksining jamoat tartibi yoki ichki xavfsizlikka jiddiy tahdidlar tug‘ilganda chegara nazoratini joriy etish imkonini beruvchi 25-moddasidan noyabr oyi oxirigacha foydalanish niyatida ekanligini ma’lum qilgan edi.
Futbol uchrashuvidan keyingi mojaro
8-juma kuni Niderlandiya poytaxti Amsterdamda mahalliy “Ayaks” klubi Isroilning “Makkabi” jamoasini qabul qilib, 5:0 hisobida g‘alaba qozondi.
Isroildan mazkur o‘yinga kelgan muxlislar uchrashuv vaqtidayoq bezorilikni boshlab, Ispaniyadagi suv toshqini qurbonlari xotirasiga saqlangan 1 daqiqalik sukutni buzib, hushtakbozlik qilishdi.
Keyin esa ular ko‘chalarni kezib, binolardan biriga osilgan Falastin bayrog‘ini yulib olishayotgani aks etgan video tarqaldi.
Shundan so‘ng Amsterdamdagi musulmon bo‘lgan migrantlar va Isroildan kelgan muxlislar o‘rtasida janjallar yuzaga keldi.
Isroil hukumatining vaziyatga munosabati
Isroil bosh vaziri Binyamin Netanyaxu Niderlandiya huquqni muhofaza qilish organlarini isroilliklarni himoya qilish bo‘yicha tezkor va qat’iy choralar ko‘rishga chaqirdi.
Isroil Tashqi ishlar vazirligiga ko‘ra, tartibsizliklarda kamida 10 nafar isroillik jarohat olgan. Fuqarolarga vaziyat barqarorlashguncha mehmonxonalardan chiqmaslik tavsiya etilgan.
Isroil ommaviy axborot vositalari yozishicha, bir necha muxlis og‘ir jarohat olgan, ba’zilarining pasportlari o‘g‘irlab ketilgan. Amsterdam politsiyasi bezorilikda ishtirok etgan o‘nlab shaxslarni qo‘lga olgan.
Isroil fuqarolarini Amsterdamdan evakuatsiya qilish uchun ikkita samolyot jo‘natgan.
Izoh (0)