AQSH prezidentligi saylovlarida g‘alaba qozongan Donald Tramp “jazolash rejalashtirilayotgan odamlarning uzun ro‘yxatiga ega”, deb yozadi Politico nashri.
“Yillar davomida Tramp o‘z chiqishlarida va ijtimoiy tarmoqdagi postlarida siyosiy raqiblari, tanqidchilari va OAV a’zolarini ta’qib qilish, qamoqqa tashlash, deportatsiya qilish va hatto qatl etishga chaqirib kelmoqda”, deb yozadi nashr.
Politicoʼga ko‘ra, ushbu qasos ro‘yxatiga amaldagi prezident Jo Bayden, AQSH vitse-prezidenti va Trampning saylovdagi raqibi Kamala Harris, sobiq prezident Barak Obama, sobiq davlat kotibi Hillari Klinton, Facebook asoschisi Mark Sukerberg, Xanter Baydenning noutbuki haqidagi xatga imzo chekkan 51 nafar razvedka mutaxassisi, shuningdek, bir qator boshqa nufuzli amerikalik siyosatchilar kiradi.
“Endi u g‘alaba qozondi, u ham xalq mandatiga, ham jazo platformasini amalga oshirishni boshlash huquqiga ega”, deyiladi materialda.
Tramp AQSH prezidentligi saylovlarida g‘olib deb e’lon qilindi: natijalarni bashorat qiluvchi bir qator yetakchi axborot manbalariga ko‘ra, u barcha asosiy shtatlarda g‘alaba qozongan. Shundan so‘ng Tramp Floridadagi tarafdorlariga murojaat qilib, g‘alabasini e’lon qilgan.
Fox News maʼlumotlariga ko‘ra, Tramp zarur bo‘lgan 270 ta ovozdan 277 tasini to‘plagan. U American Hill nashri va Decision Desk HQ nufuzli saylov natijalarini prognozlash xizmati tomonidan ham g‘olib deb topildi.
Izoh (0)