AQShning 45-prezidenti Donald Tramp radioboshlovchi Rash Limboning vafoti munosabati bilan Fox News telekanalida hamdardlik bildirdi. Bu uning davlat rahbari lavozimidan ketganidan beri birinchi marta OAVda paydo bo‘lishi, deb xabar berdi “Interfaks”.
“Atrofimizda afsonalar ko‘p emas, lekin Rash Limbo haqiqiy afsona... U bu mamlakatni, Amerika xalqini juda yaxshi ko‘rardi”, — dedi Tramp Fox News telekanaliga. Tramp radioboshlovchining vafotidan uch-to‘rt kun oldin u bilan gaplashganini aytib o‘tdi.
Rash Limbo 70 yoshida o‘pka saratonidan vafot etdi. U AQSh tarixidagi eng nufuzli mediashaxslardan biri edi. U o‘z dasturlarida aholining konservativ qarashli qatlamlari manfaatlarini himoya qilgan. Donald Tramp Limboni 2020-yilda Ozodlik prezidenti medali bilan taqdirladi. Radioboshlovchi 2021-yil yanvar oyida Kapitoliga bostirib kirgan ishtirokchilarni Mustaqillik urushi qahramonlariga qiyoslagan.
Avvalroq sobiq prezidenti Donald Tramp mamlakat siyosiy hayotidagi ishtirokini tiklashni va jurnalistlar bilan yana muloqot qilishni rejalashtirayotgani haqida xabar berilgandi. Ta’kidlanishicha, sobiq prezident “uning impichmentini qo‘llab-quvvatlagan yoki noyabrdagi saylov natijalarini bekor qilish harakatlariga qarshilik ko‘rsatgan respublikachilardan qasos olishni istayapti”.
Yanvar oyida Donald Tramp Florida shtatida o‘z vakolatxonasini ochgan edi. U “sobiq prezident devoni” deb nomlangan. Devonxona Trampning yozishmalari, ommaviy bayonotlari va nutqlari bilan shug‘ullanadi.
Izoh (0)