5-noyabr kuni AQSHda bo‘lib o‘tadigan umumiy saylov oldidan 70 milliondan ortiq Amerika fuqarosi muddatidan oldin ovoz berdi. Bu haqda Florida shtati universiteti e’lon qilgan ma’lumotlarda keltirilgan.
Hisob-kitoblarga ko‘ra, 70 053 286 AQSH aholisi muddatidan oldin ovoz berish huquqidan foydalangan. Ularning 37,4 milliondan ortig‘i saylov uchastkalarida shaxsan o‘zi, 32,6 millionga yaqini esa pochta orqali ovoz berdi.
Qo‘shma Shtatlarda ro‘yxatga olingan saylovchilar soni 168 millionga yaqin. Eng ko‘p kishi Texas (7,9 million), Florida (7,3 million) va Kaliforniya (6 million) shtatlarida erta ovoz bergan.
AQSHda navbatdagi prezident saylovi 5-noyabrda bo‘lib o‘tadi. Respublikachi Donald Tramp va demokrat Kamala Harris davlat rahbari lavozimi uchun kurashmoqda.
Tramp Amerikaning 45-prezidenti sifatida 2017-2021-yillarda bu lavozimda faoliyat yuritgan. Kamala Harris esa ayni paytda mamlakat vitse-prezidenti lavozimida ishlamoqda.
