AQSH Gruziyada qabul qilingan “xorijiy agentlar” to‘g‘risidagi qonun tufayli Tbilisi hukumati rasmiylariga nisbatan viza cheklovlari joriy etdi. Bu haqda AQSH Davlat departamenti matbuot uchun eʼlon qilgan hisobotiga asoslanib, Anadolu nashri xabar berdi.
Manbada aytilishicha, viza cheklovlari “Gruziya orzusi” partiyasi aʼzolari, parlament aʼzolari va huquq-tartibot idoralari xodimlariga qaratilgan. Endilikda ushbu cheklov o‘rnatilgan fuqarolarga AQSH vizasi berilmaydi.
AQSh Davlat departamenti ushbu yangi tartibot 6-iyun kuni kuchga kirganini bildirgan. Vashington Tbilisidagi hukumatning yangi qonuniga keskin qarshi ekanligi bildirilgan.
“Viza cheklovlarining birinchi qismi “Gruziya orzusi” partiyasi aʼzolari, parlament aʼzolari, huquq-tartibot idoralari va xususiy fuqarolarni o‘z ichiga qamrab oladi”, — degan matbuot kotibi Metyu Miller matbuot brifingida.
Millerga ko‘ra, AQSH rasmiylari Gruziyadan ushbu qonunni bekor qilishni hamda o‘z xalqi xohishiga ko‘ra G‘arb tomon harakat qilishni kutmoqda. Agar bu amalga oshmasa, Vashington qo‘shimcha choralar qo‘llashga majbur bo‘ladi.
“Gruziya rahbarlari o‘z harakatlarini qayta ko‘rib chiqib, o‘z xalqining uzoq yillar davomida bildirilgan demokratik va Yevro-Atlantika intilishlari bilan olg‘a siljish uchun qadam tashlashiga umid qilamiz. Ammo ular buni amalga oshirmasa, Qo‘shma Shtatlar qo‘shimcha choralar ko‘rishga tayyor”, — degan Miller.
AQSh rasmiylari “Gruziya orzusi” partiyasining aksildemokratik harakatlari, shuningdek, uning so‘nggi bayonotlari va ritorikasidan qattiq xavotirda ekanini bildirgan. Bu holatlar Gruziyaning Yevropa bilan taqdirini izdan chiqarishi mumkinligi aytilgan.
Oldinroq Gruziya parlamenti spikeri Shalva Papuashvili “xorijiy agentlar” to‘g‘risidagi munozarali qonun loyihasini imzolagan edi. Qonunga ko‘ra, moliyaviy byudjetining 20% dan ortig‘ini xorijdan oladigan tashkilotlar, jumladan, ommaviy axborot vositalari davlat ro‘yxatidan o‘tishlari shart. Shuningdek, ular yillik moliyaviy hisobotlarni eʼlon qilishi talab qilingan.
2023-yil mart oyida ilk bor muhokamaga kiritilgan qonun loyihasi 66 kishining hibsga olinishi va 50 dan ortiq huquq-tartibot xodimlarining jarohatlanishi bilan yakunlangan ommaviy noroziliklarga sabab bo‘lganidan keyin bekor qilingan edi. Ammo aprel oyida loyiha parlamentga qayta kiritilib, norozilik yana avj oldi.
Tanqidchilar bu qonunni demokratiyaga putur yetkazuvchi loyiha, “Rossiya qonuni” deb atagan. Gruziyada rasmiylari esa qonun shaffoflikni oshirishini taʼkidlagan.
Izoh (0)