Швеция Грузия ҳукумати билан барча тўғридан тўғри ҳамкорликни тўхтатмоқда. Бу ҳақда Швеция ташқи савдо ва ривожланиш вазири Бенджамин Дауса хабар берди.
Аввалроқ Европа иттифоқининг Европа ишлари бўйича вазирлари Грузиядаги сайловлар вақтида қонунбузарликлар туфайли юзага келган вазиятдан хавотирда эканини билдирган эди.
“Биз солиқ органлари ўртасидаги ҳамкорлик ҳақида ҳам гапиряпмиз, биз буни ҳозирги шароитда номақбул деб ҳисоблаймиз”, деди Дауса Dagens Nyheter нашрига.
Вазирнинг аниқлик киритишича, Швеция расмийлари агар мамлакат “Европа иттифоқига яна яқинлашса” Грузия билан ҳамкорликни тиклаши мумкин.
Нашр, шунингдек, 2024 йил охиригача Швеция Грузиядаги фуқаролик жамиятини қўллаб-қувватлаш учун 25 миллион крон (2,4 миллион доллар) ажратаётганини маълум қилган.
26 октябрь куни Грузияда парламент сайловлари бўлиб ўтди. Марказий сайлов комиссиясига кўра, Россия билан муносабатларни сақлаб қолиш ва Россияга нисбатан санкцияларга қарши туриш тарафдори бўлган ҳукмрон “Грузия орзуси” 53,93 фоиз овоз тўплаган. Тўрт мухолифат партияси ҳам парламентга кириб, жами 37,78 фоиз овоз олган.
Мухолифат вакиллари аллақачон МСК маълумотларини тан олмаслигини айтишган. Конституция президентнинг партиясиз бўлишини талаб қилганига қарамай, европапараст мухолифатга ёрдам бераётган Грузия президенти Саломе Зурабишвили сайлов натижалари бўйича норозилик намойишларига чақирган. Мухолифатнинг митинги 28 октябрь куни кечқурун мамлакат парламенти олдида бўлиб ўтган.
Изоҳ (0)