Janubiy Afrika hukumati mamlakatda kannabis yetishtirishni qonuniylashtirgan. Bu haqda hukumatdagi manbalarga asoslanib, Al Jazeera nashri xabar berdi.
Endilikda JAR fuqarolari uchun kannabis o‘simligi yetishtirish va undan foydalanishda cheklovlar bo‘lmaydi. Tahlilchilar kannabisga munosabat borasida Afrika qitʼasining boshqa mamlakatlari ham JARdan andoza olishga urinishi mumkinligi haqida fikr bildirgan.
Manbada aytilishicha, 27-may kuni bo‘lib o‘tadigan umumiy saylovlarda hukmron “Afrika milliy kongressi” partiyasi 30 yillik faoliyati davomida ilk bor parlament o‘rinlarining ko‘pchiligidan mahrum bo‘lgan. Bu voqeadan so‘ng barcha sohalar qatorida giyohvand moddalar qonunchiligiga ham o‘zgartirishlar kiritilgan.
Janubiy Afrika prezident Siril Ramafosa “Kannabisdan shaxsiy maqsadlar uchun foydalanish to‘g‘risida”gi aktni imzolagan. Shu tariqa Janubiy Afrika marixuanadan foydalanishni qonuniylashtirgan birinchi Afrika davlatiga aylangan.
Qonun loyihasi kannabisni mamlakatda taqiqlangan giyohvand moddalar ro‘yxatidan olib tashlaydi, yaʼni kattalar endi o‘simlikni o‘stirish va isteʼmol qilishlari mumkin (bolalar bundan mustasno). Qonun loyihasida, shuningdek, kannabis isteʼmoli yoki savdosi ko‘rinishida qonunbuzarliklar sodir etgan shaxslarning jinoiy qaydlari avtomatik ravishda o‘chirib tashlanishi belgilab qo‘yilgan. Hozirda JAR qamoqxonalarida kannabis bilan bog‘liq jinoyat ishida ayblanib qamalgan uch mingdan ortiq mahbus borligi maʼlum qilingan.
Bir qator rasmiylar ushbu qonun mamlakat yoshlari ichida giyohvand moddalarga qaramlik kuchayishiga olib kelishi haqida ogohlantirgan. Hukumat esa kannabis savdosi allaqachon mamlakatning har bir burchagida davom etayotgani, unga qarshi kurashish imkonsiz ekani va allaqachon jamiyat hayotida mavjud bo‘lgan omilga qonuniy tus berilganini aytgan.
Maʼlumot o‘rnida, kannabis Jahon sog‘liqni saqlash tashkiloti tomonidan rasman o‘tkir giyohvand moddalar ro‘yxatiga kiritilgan. Shunga qaramay, bugungi kunda 6 mamlakat: Malta, Kanada, Urugvay, Meksika, Gruziya va Janubiy Afrikada uni yetishtirish va isteʼmol qilish qonuniydir.
Izoh (0)