Gruziya Tashqi ishlar vazirligi 9-iyun kuni Rossiya hukumatini Janubiy Osetiyadan qurolli kuchlarini olib chiqishga chaqirgan bayonot eʼlon qildi. Bu haqda Gruziya hukumati manbalariga tayanib, Anadolu xabar berdi.
Manbada aytilishicha, Gruziya Tashqi ishlar vazirligi Janubiy Osetiyada o‘tkazilgan saylovlarni ham qoralagan. Hudud Gruziyaning uzviy qismi ekanligini taʼkidlagan.
Vazirlik, shuningdek, Rossiyani “Gruziya suvereniteti va hududiy yaxlitligini buzadigan harakatlarni to‘xtatishga” chaqirgan. Tbilisidan mustaqil bo‘lishga urinayotgan kuchlarni qo‘llab-quvvatlashdan tiyilishni so‘ragan.
“Gruziyaning bosib olingan hududlaridan ichki ko‘chirilganlar va qochqinlar o‘z uylariga qaytish imkoniyatidan mahrum bo‘lgan, u yerda qolgan aholi esa o‘zlarining asosiy huquq va erkinliklari poymol etilgan sharoitda yashashga majbur. Shunday bir sharoitda o‘tkazilayotgan saylovlar qonuniy natija keltira olmaydi. Bu saylovlar xalqaro huquqning asosiy normalari va tamoyillariga ziddir”, — deyiladi Gruziya Tashqi ishlar vazirligi bayonotida.
Gruziya rasmiylari Moskvani o‘zaro kelishuvlarni bajarishga, Gruziyaning xalqaro tan olingan hududlaridan harbiy qismlarini olib chiqishga chaqirgan.
“Gruziya Tashqi ishlar vazirligi Rossiya Federatsiyasini Gruziya suvereniteti va hududiy yaxlitligini buzuvchi harakatlarini to‘xtatishga, o‘z zimmasiga olgan xalqaro majburiyatlarini, xususan, Yevropa Ittifoqi vositachiligida 2008-yil 12-avgustda erishilgan o‘t ochishni to‘xtatish to‘g‘risidagi bitimni bajarishga va o‘z kuchlarini Gruziya hududidan olib chiqishga chaqiradi”, — deya qo‘shimcha qilingan vazirlik bayonotida.
Maʼlumot o‘rnida, 2008-yilda avgustda Gruziya va Rossiya o‘rtasida Abxaziya va Janubiy Osetiya bo‘lginchi hududlari masalasida mojaro ro‘y berdi. Keskinlik kuchayishi oqibatida Gruziya ikkita hududi ustidan nazoratni yo‘qotdi. Abxaziya va Janubiy Osetiya keyinchalik Moskva tomonidan mustaqil davlatlar sifatida tan olingan.
Mamlakat hududiy yaxlitligiga tahdid ortidan Gruziya Moskva bilan aloqalarini uzdi. Jahon hamjamiyati Abxaziya va Janubiy Osetiyani hali-hanuz Gruziya hududi deb biladi.
Joriy yilning 9-iyun kuni Janubiy Osetiyada parlament saylovlari bo‘lib o‘tgan. Tbilisi buni noqonuniy deb atab, keskin eʼtirozini bildirgan.
Izoh (0)