Gruziya parlamenti 1-may kuni bo‘lib o‘tgan yig‘ilishda “Xorijiy ta’sirning ochiqligi to‘g‘risida”gi qonun loyihasini ikkinchi o‘qishda qabul qildi. Bu haqda tegishli manbalarga tayanib, Meduza xabar berdi.
Birinchi o‘qishda bo‘lgani kabi, hujjatni 150 nafar deputatdan 83 nafari – “Gruziya orzusi” partiyasi va uning koalitsiyadagi hamkori “Xalq kuchi” partiyasi a’zolari qo‘llab-quvvatlagan.
Uchinchi o‘qish shartli ravishda 17-mayga belgilangan.
Minglab odamlar parlament binosi oldidagi maydonga avvalgi bir necha kundagidek to‘planib, qonun loyihasining qabul qilinishiga norozilik bildirgan.
Gruziya prezidenti Salome Zurabishvili avvalroq qonun qabul qilinsa, veto qo‘yishga va’da bergan edi. Ayni paytda hukmron partiya prezident vetosini bekor qilish uchun yetarli ovozga ega.
Qonun loyihasining muxoliflari uni “xorijiy agentlar to‘g‘risida”gi Rossiya qonunining nusxasi deb atashgan. Hujjat AQSH va Yevropada tanqid qilingan. Yevroparlament norma qabul qilingan taqdirda Gruziyani Yevropa Ittifoqiga kirish uchun nomzod maqomidan mahrum qilishni taklif etgan.
Izoh (0)