Yevropa Ittifoqi yetakchilari Gruziyani Tbilisida parlament uchinchi o‘qishda ma’qullagan bahsli “xorijiy agentlar” qonunini bekor qilishga chaqirdi, deya Deutsche Welle xabar berdi.
15-may kuni YI diplomatiyasi rahbari Jozep Borrel va Yevropa komissari Oliver Varxeli ushbu qonunning qabul qilinishi Gruziyaning YIga qo‘shilish yo‘lidagi taraqqiyotiga salbiy ta’sir ko‘rsatayotganini aytgan.
Gruziyaning kelajagi bo‘yicha qaror o‘zining qo‘lida. Biz Gruziya hukumatini qonunni bekor qilishga, YIga aʼzolik bo‘yicha o‘z majburiyatlarini saqlab qolishga va to‘qqiz bosqichda bayon qilingan zarur islohotlarni ilgari surishga chaqiramiz, — deyiladi qo‘shma bayonotda.
Yevroittifoqqa raislik qilayotgan Belgiya Gruziya parlamenti tomonidan “xorijiy agentlar” to‘g‘risidagi qonun qabul qilinganidan afsusda ekanini bildirgan.
Avvalroq Gruziya parlamenti “xorijiy agentlar” haqidagi qonun loyihasini uchinchi o‘qishda qabul qilgan edi. Yangi qoidaga ko‘ra, moliyasining 20 foizdan ko‘prog‘ini xorijdan oladigan nodavlat notijorat tashkilotlari va OAVlar “xorijiy agent” sifatida ro‘yxatdan o‘tishlari shart.
Gruziya ombudsmani Levan Ioseliyaga ko‘ra, bir oy davomida namoyishlarda 160 ga yaqin namoyishchi hibsga olingan, o‘nlab namoyishchilar politsiya tomonidan kaltaklangan.
Gruziya 2023-yil dekabridan Yevropa Ittifoqiga nomzod aʼzo. Bu maqom Tbilisiga faqat Yevrokomissiya tomonidan tavsiya etilgan to‘qqizta bosqich zaruriy bajarilishi sharti bilan berilgan. Fuqarolik jamiyati, inson huquqlari va OAVning erkinliklarini himoya qilish shular jumlasidandir.
Izoh (0)