Энергетика инфратузилмасига ҳужумларни ўзаро тўхтатиш Украинадаги фаол ҳарбий ҳаракатларга барҳам бериш йўлидаги биринчи қадам бўлиши мумкин. Бу ҳақда Украина президенти Владимир Зеленский Тhе Financial Times (ФТ) нашрига берган интервьюсида маълум қилди.
“Биз биринчи тинчлик саммитида кўрдикки, энергия хавфсизлигини ҳал қилиш мумкин, яъни биз уларнинг энергетика инфратузилмасига ҳужум қилмаймиз, улар эса бизнинг. Бу урушнинг тугашига олиб келиши мумкинми? Менимча, ҳа!”, деди Зеленский.
У, шунингдек, Россиядан Украина портларидаги юк кемаларига зарба беришни бас қилишни талаб қилган. БМТ маълумотларига кўра, 1 сентябрдан бери Россиянинг Украина Қора денгиз портларига берган зарбалари оқибатида олтита фуқаролик кемаси ва дон юклаш инфратузилмаси зарар кўрган.
Зеленскийнинг таъкидлашича, “энергетика ва навигация эркинлигида натижага эришиш Россия урушни тугатишга тайёр бўлиши мумкинлигидан далолат беради”.
Шу билан бирга, Зеленский Россия АҚШдаги президентлик сайловлари натижаларини кутишига ва шундан кейингина Киев билан музокара ўтказиш ёки ўтказмасликни ҳал қилишига ишонади.
Аввалроқ Американинг The Washington Post (WP) нашри Россия ва Украина Қатар воситачилигида энергетика объектларига ҳужумларни ўзаро тўхтатиш бўйича келишувни муҳокама қилишни режалаштирганини ёзган эди. Бўлажак учрашув иштирокчилари бу музокаралар охир-оқибат урушни тугатиш бўйича кенг қамровли келишувга олиб келиши мумкинлигига умид билдирган, бироқ WP манбаларига кўра, улар Украина Қуролли кучларининг Курск вилоятидаги ҳужумидан сўнг тўхтатилган.
Изоҳ (0)