Ukraina TIV Qrimning hududiy maqomi bo‘yicha murosaga yo‘l qo‘yib bo‘lmasligini ma’lum qildi, deb “Yevropa pravda” nashri xabar berdi.
Murojaat Polsha TIV rahbari Radoslav Sikorskining BMT mandati ostida Qrim yarim orolida referendum o‘tkazishni taklif qilgan bayonotidan so‘ng e’lon qilindi.
Ukraina vazirligining taʼkidlashicha, mamlakatning hududiy yaxlitligi “hech qachon muhokama yoki murosa mavzusi bo‘lmagan va bo‘lishi ham mumkin emas”.
“Qrim Yevropa xavfsizlik arxitekturasining og‘irlik markazidir, uni to‘liq tiklash faqat Ukrainaning butun hududi, jumladan, Ukraina yarimoroli to‘liq qaytarilganidan keyingina mumkin”, deyiladi vazirlik bayonotida.
Ukraina TIV Rossiyani Qrimdan qo‘shinlarini olib chiqishga majburlash va jinoyatlar uchun javobgarlikka tortishda qo‘llab-quvvatlashga umid bildirgan.
Polsha tashqi ishlar vazirligi rahbari Radoslav Sikorskiy Kiyevga tashrifi chog‘ida Rossiya va Ukraina urushni tugatmay turib Qrimning maqomi bo‘yicha kelishuvga erisha olmasligini aytgan edi.
“Qrim Rossiya va ayniqsa mamlakat prezidenti Vladimir Putin uchun ramziy, ammo Ukraina uchun strategik ahamiyatga ega. Biz uni BMT mandati ostida, qonuniy rezident kimligini tekshirgandan so‘ng, adolatli referendum tayyorlash missiyasi bilan topshirishimiz mumkin”, deya tushuntirgan Sikorskiy.
U mazkur jarayon 20 yilga kechiktirilishi mumkinligini qo‘shimcha qilgan. Shu bilan birga, u G‘arb anneksiya qilinganidan keyin “ukrainaliklarga Qrimda jang qilmaslikni aytib” xatoga yo‘l qo‘yganini ma’lum qilgan.
Rossiya Qrimni o‘n yil avval, 2014-yil bahorida, referendum natijalariga ko‘ra anneksiya qilgan edi. Ukraina, AQSH, Xitoy va dunyoning boshqa aksariyat davlatlarida ovoz berish natijalari tan olinmagan. Putin yarimorolning hududiy mansubligi masalasini yopiq deb atagan. 2014-yilda u Qrim Rossiya uchun muqaddas joy ekanini ta’kidlagan hamda hududni “barcha imkoniyatlar bilan” himoya qilishga va’da bergan.
2022-yil avgust oyida Ukraina prezidenti Vladimir Zelenskiy Kiyev Qrimni “o‘zi to‘g‘ri deb bilgan har qanday yo‘l bilan” qaytarishga va’da bergan. Uning so‘zlariga ko‘ra, bu “global qonun va tartibni qayta tiklash bo‘ladi”.
Izoh (0)