Shimoliy Koreya yetakchisi Kim Chen In Janub bilan urush boshlashga tayyor, biroq Pxenyan hozir ko‘proq pul ishlashga harakat qilmoqda. Bu haqda tahlilchilarga tayanib, Bloomberg yozdi.
Nashr taʼkidlaganidek, Shimoliy Koreya yetakchisi Janubiy Koreyaga ochiqchasiga urush bilan tahdid qilgan bo‘lsa-da, unda mojaroni qo‘zg‘atmaslik uchun jiddiy sabab bor — KXDR iqtisodiyotining o‘sish surʼati Rossiyaga qurol sotish ortidan deyarli o‘n yilliklardagi eng yuqori darajaga yetdi.
“Oktyabr oyidan beri Shimoliy Koreya Rossiyaga 2 milliondan ortiq artilleriya snaryadlari va bir nechta ballistik raketalarni sotdi. Raketalarning har birining narxi bir necha million dollarga yetishi mumkin, Rossiya Pxenyandan ularni uchiradigan moslamalar ham sotib olishga majbur bo‘lmoqda. Shunday qilib, KXDR sotgan asbob-uskunalar milliardlab dollarga yetishi mumkin, shuningdek, Xitoy bilan tovar ayirboshlash ortishi bilan birga mamlakat iqtisodiyoti joriy yilda 0,5 foizga o‘sishi mumkin”, — deb ta’kidlaydi nashr tahlilchilari.
Bloomberg agentligining yozishicha, Pxenyanning Kreml agressiyasini qo‘llab-quvvatlash uchun ballistik raketalar, artilleriya snaryadlari va boshqa harbiy texnika sotishi uzoq vaqtdan beri xalqaro sanksiyalar ostida qolgan Shimoliy Koreya iqtisodiyotiga turtki bermoqda.
“Bu Kim Chen Inga kelgusi yillar davomida G‘arb bilan muloqot qilishdan qochish imkonini berishi mumkin, shuningdek, 40 yoshli rahbarga urush singari keskin choralar ko‘rishga bosimni kamaytiradi”, — deb yozadi Bloomberg.
Shimoliy Koreya va Rossiya o‘rtasidagi hamkorlik chuqurlashishi kutilmoqda, Putin yaqin oylarda Pxenyanga tashrif buyurishi mumkin.
Izoh (0)