Rossiya prezidenti Vladimir Putinning Shimoliy Koreyaga tashrifi chog‘ida Kim Chen In unga kamyob pxunsan zotli ikkita ovchi itni sovg‘a qildi. Bu haqda Koreya markaziy axborot agentligi xabar berdi.
“Kim Chen In faxriy mehmonlar uchun Kimsusan qarorgohi bog‘ida prezident Putinga mamlakatimizning milliy it zoti bo‘lgan ko‘ppaklarni sovg‘a qildi”, — deyiladi KCNA bayonotida.
Shuningdek, Kim Chen In rossiyalik hamkasbini KXDRning oliy davlat mukofoti — Kim Ir Sen ordeni bilan taqdirlagan. Taqdirlash marosimi 19-iyun kuni Pxenyan shahrida bo‘lib o‘tgan.
Orden “ikki davlat o‘rtasidagi munosabatlarni rivojlantirishda alohida xizmatlari uchun” Rossiya prezidentiga “cheksiz hurmat va ishonch belgisi sifatida” taqdim etilgan, deyiladi xabarda.
O‘z navbatida, Putin shimoliy koreyalik hamkasbiga yangi “Aurus” mashinasi, admiral pichoq va choy servisini hadya etgan.
Vladimir Putin 18—19-iyun kunlari Shimoliy Koreyaga amaliy tashrif bilan bo‘ldi. Davlat rahbarlari muzokaralarga jami 11 soatdan ortiq vaqt sarfladi. Uchrashuv yakunlari bo‘yicha Rossiya va KXDR o‘rtasida har tomonlama strategik sheriklik to‘g‘risidagi bitim imzolandi. Shundan so‘ng Vladimir Putin Vyetnamga uchib ketdi.
Izoh (0)