Shimoliy Koreya yetakchisi Kim Chen In Janubiy Koreyaga qarshi yana bir keskin bayonot bilan chiqdi. Bu chegara yaqinida o‘tkazilgan keng ko‘lamli artilleriya mashg‘ulotlari va raketa sinovlaridan ko‘p o‘tmay sodir bo‘ldi.
The Guardian nashrining 16-yanvardagi xabariga ko‘ra, Kim Chen In KXDR Oliy xalq assambleyasida nutq so‘zlagan va unda mamlakat konstitutsiyasini o‘zgartirishga chaqirgan. Uning so‘zlariga ko‘ra, KXDRning asosiy qonunida Janubiy Koreya “1-raqamli dushman davlat” deb belgilanishi kerak.
Bundan tashqari, Kim Chen In Shimoliy va Janubiy Koreyani tinch yo‘l bilan birlashtirish endi imkonsizligini ma’lum qildi. U Seulni Shimoliy Koreyada rejimni o‘zgartirishga va “yashirin birlashishga” urinishda aybladi. KXDR yetakchisi Janubiy Koreya bilan to‘g‘ridan to‘g‘ri mojarodan qochmasligini qo‘shimcha qildi.
“Biz urushni xohlamaymiz, lekin undan qochish niyatimiz ham yo‘q”, — dedi u.
Kim Chen In, shuningdek, Seul va Pxenyan o‘rtasidagi harbiy mojaro sodir bo‘ladigan bo‘lsa, bu Janubiy Koreya uchun halokatli bo‘lishi va Qo‘shma Shtatlar uchun “tasavvur qilib bo‘lmaydigan mag‘lubiyat”ga olib kelishi haqida ogohlantirdi.
Shu kuni Shimoliy Koreya davlat matbuoti KCNA mamlakat “Vatanni tinch yo‘l bilan birlashtirish qo‘mitasi” hamda milliy iqtisodiyot va xalqaro turizmni rivojlantirish bo‘yicha hukumat idoralarini tugatayotgani haqida xabar berdi. KXDR Oliy xalq assambleyasi “Koreya Respublikasi bilan qayta birlashishga hech qachon erishib bo‘lmaydi”, deb e’lon qildi.
Janubiy Koreya prezidenti Yun Suk Yol Kim Chen Inning keskin so‘zlarini darhol qoraladi va Pxenyanni Koreya xalqi manfaatlariga zid ish tutishda aybladi.
“Ba’zi tahlilchilarning fikricha, Shimoliy Koreya Janubiy Koreyani o‘zining eng katta raqibi deb belgilash orqali kelajakdagi urushda yadro qurolidan foydalanishni oqlamoqchi bo‘lishi mumkin”, — deb ta’kidlaydi The Guardian.
Shimoliy va Janubiy Koreya o‘rtasida hali ham rasmiy tinchlik kelishuvi imzolanmagan. 1950—1953-yillardagi Koreya urushi doimiy tinchlik shartnomasi emas, balki rasmiy sulh bilan yakunlangan.
Izoh (0)