Avgust va sentyabr oylari Hindistonda yilning eng ko‘p bayramlari o‘tkaziladigan mavsumdir. Bu vaqtda Bollivud ham ko‘plab yangiliklarni taqdim etdi. Hind kinosi ishqibozlari uchun quyida 2024-yilda chiqqan eng qiziqarli filmlar ro‘yxatini tuzdik. Hozircha filmlar tarjima qilinmagan, ammo ularni ingliz tilidagi subtitrlar yordamida tomosha qilish mumkin.
“O‘rgimchak to‘ri” (Ulajh)
Bosh rollarda Janvi Kapur, Gulshan Devyash va Roshan Mettyu ishtirok etgan mazkur film josuslar haqidagi triller bo‘lib, vatanparvarlik tuyg‘usi bilan voyaga yetgan, jasur IFS ofitseri haqida hikoya qilinadi. Uning hayoti xavf ostida bo‘ladi, martaba va obro‘siga putur yetib, fitnalar ichida qoladi. Filmda aybsiz qahramon muammolarini qanday hal qilishini ko‘rsatib berilgan.
“Sabarmati haqida hisobot” (The Sabarmati Report)
2002-yilda sodir bo‘lgan va real voqealarga asoslangan film Ranjan Chandel tomonidan suratga olingan bo‘lib, dramatik triller janridadir. Unda Sabarmati Express voqealari va bularning bariga nimalar sabab bo‘lganligi haqida so‘z boradi.
Ziyoratchilar Purnahuti Maha Yagna deb nomlangan marosimda ishtirok etish uchun muqaddas shaharga yo‘l oladi. Ular mingan poyezd signal nuqtasi yaqinida to‘xtaydi va ularga bir guruh odamlar hujum qiladi. Poyezdga 2000 ga yaqin odam hujum qiladi, ularning hammasi vagonlarga tosh otishdan boshlaydi, so‘ng to‘rtta vagonga o‘t qo‘yadi. Yong‘in oqibatida 59 kishi poyezd ichida qolib ketib, halok bo‘ladi. Filmda bosh rollarni Vikrant Messi, Rashi Xanna va Riddhi Dogra ijro etgan.
“Mendan jasurroq” (Auron Mein Kahan Dum Tha)
Bosh rollarda Ajay Devgn va Tabu ishtirok etgan film romantik drama bo‘lib, ikki oshiqning sevgi hikoyasi 2003-yildan boshlanadi 20 yil davom etadi. Fojia tufayli ikki yosh bir-biridan barvaqt ajralgan bo‘lsa-da, taqdir ularga ikkinchi marta uchrashish imkonini beradi. Film ikkita yirik jinoyat tufayli yigirma yil davomida umrini qamoqda o‘tkazgan qotilning yetuk sevgi hikoyasi haqidadir. Uning jinoyati bo‘yicha haqiqat bolalikdagi sevgisini topganda fosh bo‘ladi.
“O‘yin vaqtida” (Khel khel mein)
“O‘yin vaqtida” filmi barchaning sirlari omma oldida fosh bo‘ladigan komediyali trillerdir. Syujetga ko‘ra, suhbat qurish uchun kechki ovqatga yig‘ilgan er-xotindan iborat do‘stlar o‘yin o‘ynashga qaror qiladi. Qoidaga ko‘ra, har bir ishtirokchi bir kunga telefonlarini qulfdan chiqarishi va unga kelgan barcha matnli va ovozli xabarni ochiqlashi kerak. Kulgili boshlangan o‘yinda tez orada dramatik burilish sodir bo‘ladi. Sirlarini oshkor qilishni istamagan erkaklarning hayoti bir kunda o‘zgarib ketadi.
“Veda” (Vedaa)
“Veda” dunyo qanchalik shafqatsiz ekanini anglab yetgan yosh va jasur ayol haqidagi jangovar film. U bu shafqatsiz va zulmkor tuzum o‘ziga o‘xshagan sodda insonlarga qarshi qaratilganligini his qiladi va shuning uchun kurashishga qaror qiladi. U dushmanlarga qarshi kurashishga tayyor bo‘lgan boshqa qo‘rqmas erkak bilan tanishadi va ular birgalikda kuchli jamoa bo‘lib, tizimga qarshi chiqadi. Bosh rollarda Sharvari Vag va Jon Abraham ishtirok etgan.
Izoh (0)