Аргентина терма жамоаси сардори ва “Интер Майами” футболчиси Лионель Месси Боливия билан ўйинда хет-трик қайд этганидан сўнг терма жамоадаги келажаги ҳақида фикр билдирди.
“Мен терма жамоада ўйнаш муддатимни белгиламайман. Мен шунчаки завқланишни ва одамларнинг эътиборини ҳис қилишни хоҳлайман, чунки бу менинг сўнгги учрашувларим бўлиши мумкинлигини биламан. Йилни босқичма-босқич яхши якунлашни истайман”, дея Мессининг сўзларини келтирмоқда Marca.
Боливияга қарши учрашувда 5 та голда (3 гол ва 2 ассист) иштирок этган футболчи Sofascore нашри томонидан 10 балл билан баҳоланди.
Бу хет-трик Мессига тўпурарлар рўйхатида иккинчи ўринда бўлган эронлик Али Даидан ўзиб кетиш имконини берди. Ҳозирда Лионель Аргентина терма жамоаси сафида 189 та ўйинда 112 та гол урган.
Рейтинг пешқадами Португалия терма жамоасининг 39 ёшли ҳужумчиси Криштиану Роналду бўлиб қолмоқда, у 216 учрашувда 133 та гол урган.
ЖЧ—2026 саралаш турнирининг 10 та ўйинида Аргентина 22 очко жамғариб, турнир жадвалида пешқадамлик қилмоқда. Футболчи Аргентина терма жамоасида 2005 йилдан буён ўйнаб келмоқда. Терма жамоа таркибида Месси 2022 йилги Жаҳон чемпионатида олтин медални қўлга киритди.
Изоҳ (0)