Dunyo va o‘zbek sportiga oid 11-oktabr kunining eng muhim xabarlari dayjesti bilan tanishing.
O‘zbekiston
Toshkentda triatlon bo‘yicha Osiyo Kubogi o‘tkazildi
Toshkentda triatlon bo‘yicha Osiyo Kubogining asosiy yo‘nalishida g‘olib va sovrindorlar aniqlandi.
Musobaqa reglamentga ko‘ra, 750 metrga suzish, 20 km velopoyga va 5 km yugurish dasturida o‘tkazildi. G‘olib va sovrindorlar ro‘yxati quyidagi ko‘rinish oldi:
Erkaklar:
- 1. Badr Sivane (Marokash) – 55:32
- 2. Matsey Bruzdyak (Polsha) – 55:36
- 3. Vitali Voronsov (Ukraina) – 55:41
- 1. Paulina Klimas (Polsha) – 1:01.16
- 2. Yeva Daniyels (Lyuksemburg) – 1:01.44
- 3. Liza Berger (Shveysariya) – 1:01.42.
Rossiyaning Moskva shahrida 7—10-oktabr kunlari ot sportining konkur yo‘nalishi bo‘yicha Yevrosiyo Kubogi bo‘lib o‘tdi. Unda O‘zbekiston terma jamoasi sportchilari muvaffaqiyatli ishtirok etdi.
Musobaqa yakunlariga ko‘ra, Bekzod Qurbonov “King Cornet L” laqabli oti bilan turnirning mutlaq chempioniga aylandi, Umid Kamilov esa “Nero Uno Rafael” laqabli otda kumush medalini qo‘lga kiritdi. Yana bir chavandoz A’zam Tolibboyev esa o‘zining “Lady” laqabli otida to‘rtinchi o‘rinni band etdi.
O‘zbekiston terma jamoasining Jahon chempionatiga boradigan tarkibi ma’lum bo‘ldi
O‘zbekiston boks terma jamoasining Belgrad (Serbiya) shahrida 26-oktabrdan 6-noyabrga qadar bo‘lib o‘tadigan Jahon chempionatida ishtirok etadigan tarkibi ma’lum bo‘ldi.
Musobaqada 13 xil vazn toifasida janglar o‘tkaziladi. O‘zbekiston terma jamoasi ushbu turnirga to‘liq tarkib bilan yo‘l oladi.
Turizm va sport vazirligi matbuot xizmatining yozishicha, quyidagi jangchilar O‘zbekiston nomidan jahon birinchiligida qatnashadi: Shahram G‘iyosov, Nodirjon Mirzahmedov, Shahobiddin Zoirov, Hasanboy Do‘stmatov, Mirazizbek Mirzaxalilov, Abdumalik Halokov, Mujibullo Tursunov, Asadxo‘ja Mo‘ydinxo‘jayev, Saidjamshid Ja’farov, Odiljon Aslonov, Shohjahon Abdullayev, Madiyor Saidrahimov, Lazizbek Mullajonov.
JahonMessi terma jamoada 80 lik dovondan o‘tdi
Lionel Messi Argentina terma jamoasining JCh—2022 saralashi doirasida Urugvayga qarshi o‘yinda (3:0) gol urdi.
Bu Messi uchun Argentina terma jamoasidagi 80-gol bo‘ldi. Shu tariqa “PSJ” futbolchisi Janubiy Amerika mintaqasi terma jamoalari futbolchilari orasida ushbu ko‘rsatkichga erishgan birinchi o‘yinchiga aylandi. Ikkinchi o‘rinda borayotgan Pelening (Braziliya) hisobida 77 ta gol bor.
Shuningdek, 34 yoshli argentinalik hujumchi terma jamoa safida 80 ta gol urishga erishgan dunyodagi beshinchi futbolchiga aylandi. Ungacha bu ishni Krishtianu Ronaldu (Portugaliya, 112 ta gol), Ali Dayi (Eron,109), Moxtar Dahari (Malayziya, 89) va Ferens Pushkash (Vengriya, 84) uddalagan.
Buskets Millatlar Ligasining eng yaxshi o‘yinchisi deb topildi
Ispaniya terma jamoasi yarim himoyachisi Serxio Buskets Millatlar Ligasi hal qiluvchi o‘yinlarining eng yaxshi futbolchisi deb topildi.
“Barselona” futbolchisi yarim final va final o‘yini natijalariga ko‘ra mukofotga loyiq ko‘rildi.
33 yoshli yarim himoyachi Italiya (2:1) va Fransiyaga (1:2) qarshi o‘yinlarni to‘liq o‘tkazdi, finalda esa Mikel Oyarsabalning goliga assistentlik qildi.
Benzema Fransiya terma jamoasi bilan ilk sovrinini qo‘lga kiritdi
Hujumchi Karim Benzema Fransiya bilan Millatlar Ligasida g‘olib chiqib, terma jamoadagi dastlabki sovrinini qo‘lga kiritdi.
Bu uning faoliyatidagi 26-sovrin bo‘ldi. Bungacha Benzema “Lion” bilan 7 ta, “Real” bilan esa 18 ta sovringa ega chiqqandi.
Fransiya Jahon Chempionati, Yevropa chempionati va Millatlar Ligasida g‘alaba qozongan ilk terma jamoa
Fransiya terma jamoasi Millatlar Ligasi finalida Ispaniyani mag‘lub etib, musobaqa g‘olibligini qo‘lga kiritdi.
Shu tariqa “uchranglilar” uchta xalqaro turnir — Jahon Chempionati (1998, 2018), Yevropa chempionati (1984, 2000) va Millatlar Ligasida g‘olib bo‘lgan birinchi jamoaga aylandi. Umuman olganda esa Fransiya ushbu musobaqalarda umumiy hisobda besh marta g‘alaba qozongan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)