Toshkent shahrining Sergeli tumani Sug‘diyona ko‘chasidagi abgor holat aholi noroziligiga sabab bo‘layotgani, ko‘chaning bunday holga kelishi hududda 10 kVt yuqori kuchlanishli kabel yangilanishi bilan bog‘liq ekani xabar berilgandi. Mazkur maqolada hokimlik mas’ullari aytilgan vazifalarni bajarmagani, belgilangan muddat o‘tsa-da, va’da va’daligicha qolgani ham tilga olingandi.
“Daryo” fuqarolarning takroriy murojaatiga ko‘ra yana mavzuga qaytdi.
Murojaatchilar mazkur muammo hamon yechimini topmaganini, “ta’mirlash ishlari bir haftada yakunlanadi” degan hokimlik oradan bir oy o‘tsa-da, ishlarni hatto boshlamaganini aytmoqda.
“Daryo”ning bu haqdagi savoliga javob bergan hokimlik mutasaddilari hali moliyalashtirish ishlari davom etayotganini, qachonki moliyalashtirish yakunlansa, shundan so‘ng ishlar boshlanishini ma’lum qildi.
Sergeli tumanining “Sug‘diyona” mahallasidagi ichki ko‘chalarni joriy ta’mirlash ishlari moliyalashtirish davom etayotgani sababli kechikmoqda. Moliyalashtirish ishlari yakunlangach, ichki ko‘chalarni asfaltlash tugatilishini ma’lum qilamiz, deydi Abdurahmon ismli mas’ul hokimlik axborot xizmatiga bergan ma’lumotida.
Dastlabki maqolada murojaatchilar Sergeli tumani hokimi Elbek Shukurovning shaxsan o‘zi Zarunar 2-tor ko‘chasi bilan tutash hududni ham asfalt qilishga va’da bergani, biroq hokim va’dasini to‘liq bajarmaganini aytgandi. Aholiga ko‘ra, ushbu ko‘chaga olib kiruvchi yo‘lning faqat kirish qismi hisobot uchun asfalt qilinib, qolgan qismi qolib ketgan.
Binoyidek asfaltlar kesib olinib, olib ketilmoqda. Yo‘llarning ahvoli borgan sari yaxshilanish o‘rniga yomonlashmoqda, deydi aholi vakillari.
“Daryo” jurnalisti bilan muloqotda bo‘lgan sug‘diyonaliklar hokimlik 2024-yilning 23-sentyabr kuni tuman aholisiga e’lon berib, Jaloyir ko‘chasi Sug‘diyona ko‘chasi chorrahasidan Obihayot ko‘chasi chorrahasigacha bo‘lgan yo‘llar avtomobillar harakati uchun o‘sha kundan ochilganini, 2024-yilning 5-oktyabr kunidan boshlab esa Sug‘diyona ko‘chasi avtomobillar harakati uchun ochilishini ma’lum qilganini, biroq va’da bajarilmaganini ta’kidlamoqda.
Hokimlik bunga izoh berar ekan, “Avvalroq Sergeli tumani hokimligi rasmiy Telegram kanalida Sug‘diyona ko‘chasi 2024-yil 5-oktyabrda avtomobillar harakati uchun ochilishi haqida xabar qilingandi. Montaj ishlari bilan bog‘liq holda pudrat tashkiloti tomonidan qurilish materiallari talab va normalarga mos kelmasligi aniqlandi. Bu esa o‘z navbatida demontaj ishlari va qurilish materiallarini almashtirish tufayli avtomobillar harakati uchun yo‘lning ochilishini kechiktirdi. Talablar va standartlarga mos kelmadi. 2024-yil 1-noyabrgacha avtomobillar harakati uchun Sug‘diyona yo‘lining ochilishi rejalashtirilgan”, dedi.
Izoh (0)