“Prezident ham hudud uchun mehmon-da”. Sergeli hokimi davlat rahbari tashrifidan avvalgi tayyorgarliklarga izoh berdi

Toshkent shahrining Sergeli tumani hokimi Elbek Shukurov odamlar orasida yuruvchi “Hokimlar prezident kelishiga tayyorgarlik ko‘radi, qilinmagan ishlar qilinadi, hamma joy tozalanadi”, degan gapga to‘xtalib, bunga izoh berdi. Hokim bu haqda “Daryo” nashri bilan bo‘lgan suhbatida gapirdi.

Internetni, ijtimoiy tarmoqlarni ko‘p o‘qiyman-da. Ko‘pchilik “prezident kelishiga tayyorgarlik qilib, hammayoqni tozalab qo‘yishadi”, deyishadi. Menga ham shu gapni aytgan opaga “Siznikiga ertaga mehmonga borsam bo‘ladimi, dedim. Opa “bemalol kelavering”, dedi. Ertaga tush paytiga boraman, dedim. “Xo‘p, keling”, dedi. Mabodo, borishimga qizingizga yoki nabirangizga hovlini supurib qo‘y, eshik tagini tozalab qo‘y, bugun uyimizga mehmon keladi deb aytasizmi, dedim, uyda bolalaringizdan berkitgan eng shirin shirinliklarni stol ustiga qo‘yib, mehmonni kutib olasiz, to‘g‘rimi, dedim. Opa “to‘g‘ri” dedi. Prezident ham Sergeliga kelsa, Sergeli ahli uchun mehmon-da, dedim. Qaysi tumanga borsa ham, mehmonda, mehmon kelishi oldi albatta tozalaymiz-ku, dedim. Kim kelsa ham, biz uyimizni toza va ozod qilib kutib olishimiz kerak-da. Bu bizning mentalitetimiz, tarbiyamiz-ku dedim, — deydi Sergeli tumani hokimi.

Xohlaymizmi yo‘qmi, bizning, davlat tashkilotlari rahbarlarining birinchi rahbari aslida xalq. To‘g‘ridan to‘g‘ri ularga bo‘ysunib, ulardan pul olyapmiz. Boshqaruvning tepasida prezident turib, xalqqa yoqadigan ishlarni bajartirmoqda. Biz hokimlar esa xalqqa ma’qul ishlarni bajarib, ularning xizmatida yuribmiz. Yoki qilmayotgan bo‘lsak, qilib berishimiz kerak, — deydi hokim.

Shu mahallalarda yashovchi aholi vakillaridan qilinishi kerak bo‘lgan ishlarga ulgurmaganim uchun uzr so‘rayman. “Xonobod” va “Eski Jalariq” mahallalarida gaz bosimi past bo‘lgani uchun, elektr energiyasidagi uzilishlar sabab uzr so‘rayman. Bu shunchaki uzr emas, bu meni rostmanasiga qiynayotgan masala, shuning uchun bu hududlarda ishlovchi aholidan uzr so‘rab, 2023-yilda ham faoliyatimni davom ettirsam, shu kamchiliklarni bartaraf qilaman deb va’da beraman, — dedi Sergeli tumani hokimi.

Elbek Shukurov sinovli vaziyatlarda prezidentga judayam qiyinligini aytib, buni yurakdan his qilishini ta’kidlamoqda.

Hamma ish, hamma yangiliklar tezda ro‘y bermaydi. Buni tan olish kerak. Hamma yaxshi natijalarga sekin-astalik bilan erishiladi. Davlat ishida bo‘lmagan odamlar buni tushunmasligi mumkin, ammo shu davlat ishidagilar juda yaxshi biladiki, prezidentga judayam qiyin. Boshqa bir hududga pul berayotgan paytda boshqa bir ishdagi mablag‘dan olib qolib, o‘sha hudud ham obod bo‘lsin degan mazmunda u yerga ham mablag‘ ilinadi. Shaxsan men buni yurakdan his qilaman va buning prezident uchun naqadar qiyinligini bilaman. Bunday paytda odamlarning sabri va qo‘llab-quvvatlovi judayam muhim. Sabr deganda borimiz shu demoqchimasman. Hammasini qilamiz, faqat shunaqa og‘ir vaziyatlarda xalq ham qo‘llab-quvvatlasa, davlat rahbarida ham, bizda ham yanayam kuch-quvvat bo‘ladi. Odamlar bizni ruhlantirsa, barchasiga erishamiz. Sergeli tumanidagi prezident komandasi bilan tog‘larni talqon qilamiz, faqat bizni ham qo‘llab turishsa, shu yetarli, — deydi tuman hokimi.