Тошкент шаҳрининг Сергели тумани Суғдиёна кўчасидаги абгор ҳолат аҳоли норозилигига сабаб бўлаётгани, кўчанинг бундай ҳолга келиши ҳудудда 10 кВт юқори кучланишли кабел янгиланиши билан боғлиқ экани хабар берилганди. Мазкур мақолада ҳокимлик масъуллари айтилган вазифаларни бажармагани, белгиланган муддат ўца-да, ваъда ваъдалигича қолгани ҳам тилга олинганди.
“Дарё” фуқароларнинг такрорий мурожаатига кўра яна мавзуга қайтди.
Мурожаатчилар мазкур муаммо ҳамон ечимини топмаганини, “таъмирлаш ишлари бир ҳафтада якунланади” деган ҳокимлик орадан бир ой ўца-да, ишларни ҳатто бошламаганини айтмоқда.
“Дарё”нинг бу ҳақдаги саволига жавоб берган ҳокимлик мутасаддилари ҳали молиялаштириш ишлари давом этаётганини, қачонки молиялаштириш якунланса, шундан сўнг ишлар бошланишини маълум қилди.
Сергели туманининг “Суғдиёна” маҳалласидаги ички кўчаларни жорий таъмирлаш ишлари молиялаштириш давом этаётгани сабабли кечикмоқда. Молиялаштириш ишлари якунлангач, ички кўчаларни асфалтлаш тугатилишини маълум қиламиз, дейди Абдураҳмон исмли масъул ҳокимлик ахборот хизматига берган маълумотида.
Дастлабки мақолада мурожаатчилар Сергели тумани ҳокими Элбек Шукуровнинг шахсан ўзи Зарунар 2-тор кўчаси билан туташ ҳудудни ҳам асфалт қилишга ваъда бергани, бироқ ҳоким ваъдасини тўлиқ бажармаганини айтганди. Аҳолига кўра, ушбу кўчага олиб кирувчи йўлнинг фақат кириш қисми ҳисобот учун асфалт қилиниб, қолган қисми қолиб кетган.
Бинойидек асфалтлар кесиб олиниб, олиб кетилмоқда. Йўлларнинг аҳволи борган сари яхшиланиш ўрнига ёмонлашмоқда, дейди аҳоли вакиллари.
“Дарё” журналисти билан мулоқотда бўлган суғдиёналиклар ҳокимлик 2024 йилнинг 23 сентябрь куни туман аҳолисига эълон бериб, Жалойир кўчаси Суғдиёна кўчаси чорраҳасидан Обиҳаёт кўчаси чорраҳасигача бўлган йўллар автомобиллар ҳаракати учун ўша кундан очилганини, 2024 йилнинг 5 октябрь кунидан бошлаб эса Суғдиёна кўчаси автомобиллар ҳаракати учун очилишини маълум қилганини, бироқ ваъда бажарилмаганини таъкидламоқда.
Ҳокимлик бунга изоҳ берар экан, “Аввалроқ Сергели тумани ҳокимлиги расмий Telegram каналида Суғдиёна кўчаси 2024 йил 5 октябрда автомобиллар ҳаракати учун очилиши ҳақида хабар қилинганди. Монтаж ишлари билан боғлиқ ҳолда пудрат ташкилоти томонидан қурилиш материаллари талаб ва нормаларга мос келмаслиги аниқланди. Бу эса ўз навбатида демонтаж ишлари ва қурилиш материалларини алмаштириш туфайли автомобиллар ҳаракати учун йўлнинг очилишини кечиктирди. Талаблар ва стандартларга мос келмади. 2024 йил 1 ноябргача автомобиллар ҳаракати учун Суғдиёна йўлининг очилиши режалаштирилган”, деди.
Изоҳ (0)