Telegram’dagi kanal admini Sergeli hokimidan ta’mirtalab ko‘chada intervyu berishni so‘radi. Hokim bunga rozi bo‘ldi, ammo adminni topolmadi

Telegram’dagi “Kompramatuzb” kanalida Sergeli tumani hokimi Elbek Shukurovga murojaat yo‘llanib, “Hurmatli hokim, kecha yurib intervyu berganingizda ravon yo‘ldan yurgan edingiz, mana shu ko‘chada ham intervyu bersangiz”, deyildi. Bu chiqishga javob bergan Elbek Shukurov jonli efir qilib, kanal adminiga suhbatga tayyorligini, kim u bilan ta’mirtalab ko‘chada suhbatlashmoqchi bo‘lsa, unga aloqaga chiqishini so‘radi. Bu haqda hokim Facebook’dagi jonli efirida gapirdi.

Ma’lum bo‘lishicha, Telegram messenjeridagi “Kompramatuzb” kanalida Sergeli tumani hokimi Elbek Shukurovga xayrli kun tilanib, tumanning “Xonobodtepa” mahallasi Yakubova 3-tor ko‘chasida ta’mirtalab yo‘llar borligi aytilib, hokimdan aynan shu ko‘chalarda intervyu berish so‘ralgan.

Bu “Xonobodtepa” mahallasi. Shu ko‘chada intervyu bersangiz, deb so‘rashibdi. To‘g‘risi, men intervyu berishim uchun mendan intervyu oladigan odam bo‘lishi kerak-da, intervyu oladigan odam bo‘lmagach, shu tarzda jonli efir qilib, savollarga javob bermoqchiman, — deydi Telegram’dagi tanqidiy postga onlayn javob qilgan hokim.

Tuman hokimi anchadan beri jonli efir qilmaganini, kuz-qish mavsumi qiyinchiliklar bilan o‘tayotgani, shuningdek, aholida ko‘plab savollar tug‘ilib qolgani uchun yana jonli efirlarini boshlashini bildirgan.

Bugun ertalab judayam xursand bo‘ldim. Telegram’dagi “Kompramatuzb” kanali tashabbus bilan chiqib, menga yordam berishga chog‘lanibdi. Kanalda tuman hududidagi muammolar ko‘rsatilayotgani uchun kanal adminiga tashakkur izhor qilaman. Kanalda 120 ming nafarga yaqin kuzatuvchi bor va, o‘ylaymanki, bu kuzatuvchilar orasida sergeliliklar ham ko‘p. Shu paytgacha ko‘plab ommaviy axborot vositalari bilan hamkorlik qilib kelganmiz. Endilikda “Kompramatuzb” kanali bilan ham hamkorlik qilib, kamchiliklarni ko‘rib, kuzatib borsak, uni to‘g‘rilashimiz oson bo‘ladi. Bu menga katta yordam bo‘ladi, — deydi u.

Hokim tumandagi mahallaning ahvoli haqida qo‘shimcha ma’lumotlar va mas’ullar izohi kerak bo‘lsa, tayyorligini aytib, “Kompramatuzb” kanali botiga javob yuborganini, ammo kanal admini u bilan bog‘lanmaganini aytmoqda.

Telegram botlaringizga o‘zimning 24 soat ishlab turadigan shaxsiy telefon raqamim, Telegram manzillarim haqida axborot qoldirdim. Har qanday savolga, suhbatga ham tayyorligimni bildiraman. Ammo sizlardan javob bo‘lmadi. Balki texnik muammolar bordir. Tan olamiz, Sergeli tumani ideal tuman emas, o‘ziga yarasha muammolari bor. Bu murojaatdan so‘ng yana murojaatlar ko‘payishi tayin. Barcha murojaatlar joylab boriladigan bo‘lsa, kanalda faqat Sergeli tumani haqida ma’lumotlar chiqa boshlaydi. Shu sabab qo‘shimcha savollar va yana muammolar bo‘lsa, javob berishga tayyorman. Menga javob kelmagach, jonli efirga chiqib, barcha savollarga javob berishga jazm qildim, — deydi tuman hokimi.

Elbek Shukurov Telegram’dagi chiqishga javob berar ekan, “Xonobodtepa” mahallasining faqatgina Yakubova 3-tor ko‘chasi emas, aksariyat ko‘chalari mana shunaqa abgor ahvoldaligini ham tan olgan.

Sergeli tumaniga Toshkent viloyatidan 13 ta mahalla o‘tgan bo‘lib, shu mahallalarning biri “Xonobodtepa” mahallasi hisoblandi. 13 ta mahallaning 11 tasida asfaltlashtirish ishlari olib borilgan. Ko‘plab ko‘chalari ta’mirlangan. Jumladan, “Xonobodtepa” mahallasidagi ko‘chalarda ham ta’mirlash ishlari bo‘lgan. Faqatgina suv o‘tkazilishi kerak bo‘lgan ko‘chalar asfaltlashtirilmagan, shag‘al to‘kib qo‘yilgan. Sababi aholining ko‘pchiligi suv o‘tkazish ishlari yakunlanganidan so‘ng asfaltlashtirish lozimligini so‘ragan. Shunga javoban ta’mirlash ishlari to‘xtatilgan. O‘zim ham shu fikrdaman. Boisi suv o‘tkazish ishlari bo‘lsa, yana qaziladi va asfalt xohlaysizmi yo‘qmi, cho‘kadi, buziladi. Biroq bu ko‘chalarni asfalt qilish uchun ajratilgan pullar turibdi. Tender o‘tkazilib, pudratchi ham aniqlangan. Vaqti-soati bilan bu ko‘chalarni ham ta’mirlab, asfaltlashtirish ishlarini amalga oshiramiz, — deydi tuman hokimi.

Hokim, shuningdek, kanal adminiga yana bir bor murojaat qilib, unga aloqaga chiqilsa, aholi muammolari yuborilsa, aholi muammolarini yechish yanayam oson bo‘lishini, ish tez bitishini aytgan.

Siz kuniga o‘nlab murojaatni e’lon qilsangiz, axborot xizmatim javob berishga ulgurmasligi mumkin. Shu sabab agar aloqaga chiqilmasa shu tarzda, ya’ni jonli efirga chiqib barcha savollarga javob berishga tayyorman. Biz bundan oldin ham ko‘pchilik jurnalist va blogerlarning savollariga, bizga yuborgan murojaatlariga o‘z vaqtida javob berib kelganmiz, — deydi Elbek Shukurov.