Toshkent shahrida 500 gektardan ortiq maydondagi uy–joylar talabga javob bermaydigan holatdaligi uchun renovatsiya dasturiga kiritilgan. Bu haqda poytaxt hokimi Shavkat Umurzoqov “O‘zbekiston 24” telekanaliga bergan intervyusida aytib o‘tdi.
Toshkent shahrida davlat-xususiy sheriklik shartlarida loyihalarni amalga oshirishning soddalashtirilgan tartibi, renovatsiya loyihalarini amalga oshirish, “hayotiy davr shartnomasi” asosida hamkorlik qilish tartiblari tasdiqlandi. Shavkat Umurzoqovning aytishicha, yangi loyihalar yuzasidan o‘tkazilgan yig‘ilishda prezident renovatsiya mexanizmi qanday bo‘lishi kerakligini tushuntirib, loyihalarni tasdiqlab bergan.
“Qurilish va renovatsiyadagi muammolarni yechish oldimizdagi dolzarb masalalardan bo‘lib turibdi. Ko‘p yillar ilgari ikki qavatli binolar, Sergeli tumanida vaqtinchalik uylar qurilgan. Ular talabga javob bermaydi va xavfsizlik nuqtayi nazaridan risklari katta. Davlat biznesga sharoit yaratib bergani uchun xususiy sektor ularni kelgusida bemalol ko‘chiradi, u yerlarga chiroyli qurilish obyektlarini barpo etadi. Bizda taxminan 500 gektardan oshiq hudud renovatsiyaga tushgan. Lekin aniq mexanizm yo‘q edi. Hozir bu masala yechildi. O‘ylaymanki, bu xususiy sektorga ishlash uchun katta imkoniyat”, — dedi hokim telekanalga bergan intervyusida.
Hokimning qo‘shimcha qilishicha, Toshkent shahrining Yangihayot tumanidagi 664,5 gektar yer maydonida “Yangi avlod” sanoat zonasi barpo etiladi.
“Beriladigan har bir gektar yer maydonini ishlab chiqarilgan mahsulotning qiymatiga bog‘laymiz. Yaʼni yerlar har bir gektarida kamida 1,5 – 2 million dollarlik mahsulot ishlab chiqarish sharti bilan beriladi. Agar sanoatni shahar hududidan olib chiqsak, kommunal, yo‘l infrastrukturamizga bo‘lmadi deganda 30 foiz “nagruzka”ni yechib olamiz”, —dedi Shavkat Umurzoqov
Eslatib o‘tamiz, Shavkat Mirziyoyev 2018-yil dekabrda parlamentga yo‘llagan murojaatnomasida renovatsiya dasturini yaʼni, foydalanish muddati tugab, eskirib qolgan ko‘p qavatli uylar o‘rnida yangi va zamonaviy uylar qurish dasturini ishlab chiqish lozimligini aytgandi.
Izoh (0)