Toshkent shahrining Sergeli tumanida joylashgan ko‘p qavatli uyda yashovchi aholi vakillari uy sharoitidan shikoyat qilib, “Daryo”ga murojaat yo‘lladi. Aholi hokimlik mas’ullari g‘aflat uyqisida ekanini aytib, mas’ullarga qilingan shikoyatlar samarasiz qolayotganini ta’kidlamoqda. Aholining yozishicha, ularni atigi 2 ta muammo: liftlarning ishlamasligi va tomdan chakka o‘tishi qiynamoqda.
Qo‘yingni sot, molingni sot, qo‘shimchasiga kredit ol va yangi qurilgan “dom”lardan xonadon sotib ol. Bu — yangi maqol emas, balki xalq og‘zaki ijodiyotidir. Qiyinchiliklar tugayvermasa, boz ustiga prezidentimiz tomonidan aholi turmush tarzini yaxshilash hamda xalq uchun qulayliklar yaratib berish ustuvor vazifa sifatida ilgari surilayotgan paytda mutasaddilar tomonidan ha deb ijrosi yo‘q, yolg‘on va’dalar bilan aldanib kelaversang, bunday maqollar naryoqda tursin, doston ham bitib yuborishing hech gap emas ekan, — deydi “Daryo” jurnalistiga bu haqda murojaat qilgan aholi vakillaridan biri Hasan Abdug‘aniyev.
Aholining ma’lumot berishicha, hokimlik binosining shundoqqina biqinida joylashgan 14 qavatli uyda 114 ga yaqin xonadon mavjud.
Biroq, bu yerda yashaydiganlarning fikri hech kimga qiziq emas. Yurtboshimiz tumanga tashrif buyurmoqchi bo‘lsa binoning tashqi fasadi yangidan rang-barang bo‘lib qolishini aytmasa, tomi teshiq, ammo hokim janoblarining obro‘si uchun usti yaltiroq... degan darajaga kelib qolgan. Muammoning eng kattasi hokimiyat keyingi yilga yangisini o‘rnatib beramiz deb va’da berilgan “lift” mana uchinchi yil o‘tyaptiki, o‘sha-o‘sha. Amallab, zo‘rg‘a ishlab turgan liftga 4 kishi baravar kirsa, havo yetmay qoladi. O‘zingiz bir o‘ylab ko‘ring, liftni kutish yoshlar uchun u qadar muammo emasdir, lekin keksalar va yosh bolalilar nima qilishsin? Shoshilinchda tez yordam chaqirsangizu bu “lift” ishlamay tursa dardingizni kimga aytasiz?, — deydi murojaatchi.
Qo‘shimcha qilinishicha, zo‘rg‘a ishlab turgan lift yonidagi yuk tashishga mo‘ljallangan lift esa, necha yildirki, buzuq.
Yog‘ingarchilikda bino tomining umumiy foydalanish qismidan chakka emas, chelaklab suv oqishini aytmay qo‘yaqolay. To‘g‘ri, turar joyga oid allaqanday xususiy uy-joy mulkdorlari shirkati ham bor va unga fuqarolar nima uchundir pul ham to‘lab kelamiz, ammo ularning ham qorasini shu to‘lov vaqtida ko‘ramiz, xolos. Janob Elbek Shukurov bizni eshitasizmi? Uy-joy, kommunal xizmat ko‘rsatish va obodonlashtirish masalalari bo‘yicha o‘rinbosaringiz Abuzar G‘aniyevga so‘zingiz o‘tadimi?, — deydi aholi vakillaridan biri Hasan Abdug‘aniyev.
Aholi hokimga murojaat qilar ekan, binodagi ikkinchi yuk tashishga mo‘ljallangan “lift”ni ishlatib berilishini so‘ramoqda.
Yozning jaziramasida yosh bolalar va keksalar haqingizga duo qilishadi. Bizning murojaatimizga ham vijdonan yondashsangiz bu masala hokimiyat uchun chikora ish ekanligini yaxshi bilamiz. Darvoqe, murojaatimizga falon edi, pismadon edi, javobimizga qoniqmasangiz (tuman hududida yo‘q albatta) bizdan yuqori turuvchi tashkilotlarga murojaat qilishingiz mumkin qabilidagi munosabatingiz shart emas. Bizga natija kerak, — deydi aholi vakillari.
Izoh (0)