Sergeli tumani hokimi Elbek Shukurov Ommaviy axborot vositalarining doimiy kuzatuvchisi, ijtimoiy tarmoqlarning faol foydalanuvchisi ekanini aytib, bu tizim bilan hamkorlik qilgan rahbar muammolar haqida tez xabar topishini aytmoqda. Bu haqda u “Daryo” nashriga bergan intervyusida gapirdi.
Jurnalist yoki blogerlar har doim ham haq, ular doim to‘g‘ri gapiradi deyish xato. U ham biror bir masalada fikrlab, muammoni ochib berayotganida murojaatchidagi mavjud ma’lumotdan kelib chiqib, fikr bildiradi. Yoritadi. Undan keyin hokimiyat yoki davlat tashkiloti vakili bilan suhbatlashganidan so‘ng uning fikri o‘zgarishi yoki to‘ldirilishi mumkin. Shuning uchun uning yoritib bo‘lgan ma’lumotidan xafa bo‘lishning keragi yo‘q. Shunaqa paytda biz hokimlar qo‘rqib, ketib ko‘p xatolarga yo‘l qo‘yib qo‘yamiz, — deydi Sergeli tumani hokimi Elbek Shukurov.
Hokimning fikricha, jamiyatda, ayniqsa hokimiyat tizimida ikkiyuzlamachi xodimlar ko‘p va ular rahbarning aynishiga sabab bo‘ladi.
Men ham imkon qadar hokimlikdagi komandamni saralaganman. Ammo hammasi bo‘lmasa ham ichida biror bir ish qilsangiz, “xo‘jayin zo‘r ish qildingiz, zo‘r aytdingiz, bopladingiz, shunaqa qilish kerak edi”, deb Sizni maqtaydigani topiladi. Siz bu gapni bir eshitasiz, ikki eshitasiz va uchinchisida shu gapga o‘rganasiz. Rahbar bunga o‘rgandimi atrofidagi kamchiliklarini ko‘rmay qoladi. Shunday paytda ko‘zimizni ochib turuvchi bu — ijtimoiy tarmoqlar. Ular bizga ko‘zgu bo‘lib, kamchiligimizni ko‘rsatib turadi. Siz kamchiliklar haqida o‘qiy boshlaganingizda, odamlarning bu haqda Sizga yozish imkoni yaratilganida Siz qilayotgan ish o‘sha to‘rt nafar xodimingiz maqtaganidek juda zo‘rmas, xato ekanini tushuna boshlaysiz, — deydi tuman hokimi.Elbek Shukurovning aytishicha, ijtimoiy tarmoqlar unga odamlarning arz-dodini yetkazuvchi asosiy minbar bo‘lishidan tashqari xodimlariga berilgan topshiriq ijrosini kuzatuvchi vosita hamdir.
Aytaylik biror-bir xodimingizga topshiriq berdingiz, u o‘sha ishni qanday bajarganini odamlar ijtimoiy tarmoqlar orqali yozib boradi. O‘qiganingizda nomiga kelib, oqlab-ko‘klab ketdi deyishgan bo‘lsa, demak xodimingiz hech qanday ish bajarmagan. Siz buni ijtimoiy tarmoq orqali kuzatib borsangiz va buni xodimingiz bilsa, tushunib yetsa, Siz bergan topshiriqni yanayam mas’uliyat bilan bajaradi, — deydi u.Sergeli tumani rahbarining qo‘shimcha qilishicha, bugun odamlarda hokimiyat tizimi bo‘ladimi yoki biror bir tashkilotmi uning oddiy xodimlariga ishonch yo‘qolgan. Hamma muammosini aynan hokimga aytishni istaydi.
Bilasizmi nega bunday bo‘lgan. Prezidentimiz to‘g‘ri aytadilar, biz uzoq yillar davomida odamlarni eshitmay, ular bilan yuzma-yuz uchrashmay qo‘ydik. Hokim yoki biror bir rahbarning qabuliga kelgan fuqaro oddiy qorovul yoinki biror bir xodim bilan gaplashib, qaytib ketadigan bo‘ldi. Shu sabab odamlar oddiy xodimlarga ishonmay qo‘ydi. Aslida fuqaro hokimga muammosini aytsa ham uning bajaruvchisi o‘sha oddiy xodim bo‘ladi. Hokim o‘sha topshiriqni baribir qo‘l ostidagilarga topshiradi va bajartiradi. Odamlar shuni bilsa-da, baribir hokimni ko‘ray, unga muammoyimni aytay deydi. Biz ularni shu ahvolga keltirib qo‘ydik. Endi bu odatni qanday yo‘q qilamizki, biz odamlarga ishxonangizga kelmasa ham Sizga dardini aytish, yozish imkonini yaratishimiz kerak. Bunda esa bizga ijtimoiy tarmoqlar asqatadi, — deydi hokim.Tuman rahbari ijtimoiy tarmoqlardagi faolligini, doimo jonli efirlar tashkil qilib turishini aksariyat rahbarlar, aynan hokimlar ham piar deb baholaganini aytmoqda.
Men oxirgi paytlarda deyarli ijtimoiy tarmoqlarga chiqmay qo‘ydim. Buni piar deb baholovchilar ham topildi. Eng yomoni buni davlat tashkilotida ishlovchilar, kasbdosh hokimlar ham aytib, mana piar qilib yuribdi degan gaplarni aytishdi. To‘g‘risi, menga piar umuman kerakmas. Men faqat xalqqa yaqin bo‘lish uchun, xalqqa hisobot berish uchun ijtimoiy tarmoqda faol bo‘lishga urinaman, — deydi Elbek Shukurov.Hokimning tan olishicha, yoshlar tashkilotidagi faoliyatida ko‘p gapirgan bo‘lsa, hokimiyat tizimida ko‘p gapirish emas, amaliy ishga o‘tish kerakligini tushunib yetgan.
Men Kamolot yoshlar tashkilotida ishlagan paytim juda ko‘p intervyu berganman, ko‘p televideniyega chiqqanman. Yetarli darajada tanilganman. Hozir menga tanilish kerakmas, menga piar shartmas. Men hokimiyat tizimiga kelib, ko‘p gapirish emas, amaliy ish qilish kerakligini ham tushunganman. Aslida ijtimoiy tarmoqlarda faol bo‘lishimdan yana bir maqsad matbuot xizmatim faoliyatini ham jonlantirish bo‘lgan, — deydi hokim.
Izoh (0)