“Daryo”da “Vazir Hilola Umarova maktab oshxonalari auksionda sotilmasligini aytgandi. Sergeli, Yangihayot va Bektemirda vazir topshirig‘iga zid ishlar olib borilmoqda” sarlavhali maqola e’lon qilingandi. Maktabgacha va maktab ta’limi vazirligining Toshkent shahar boshqarmasi mazkur maqolaga munosabat bildirdi.
Mazkur maqolada Yangihayot tumani maktabgacha va maktab ta’limi bo‘limi tasarrufidagi 3- va 304-sonli umumta’lim maktablari direktori bilan “Daryo.uz” vakillari borib suhbatlashganligi e’lon qilingan. Haqiqatan joriy yilning 21-sentyabr kuni “Daryo.uz” xodimi maktab direktorlari bilan suhbat o‘tkazgan hamda bo‘lim boshlig‘i D.Mustafayeva bilan ham telefon orqali gaplashgan. Suhbat davomida maktab oshxonalarini ijaraga berish uchun va auksionga qo‘yish bo‘yicha bo‘lim boshlig‘i tomonidan yig‘ilish o‘tkazib topshiriq berilganligi yoki topshiriq berilmaganligi haqida so‘ragan. Unga ko‘ra, bo‘lim boshlig‘i tomonidan hech qanday yig‘ilish o‘tkazilmagan va oshxonalarni auksion orqali ijaraga berish bo‘yicha direktorlarga topshiriq berilmagan, deyiladi boshqarma munosabatida.
Mas’ullarning bildirishicha, Yangihayot tumanidagi 2-sonli maktab oshxonasining auksionda sotilishiga maktab rahbariyatining vazir topshirig‘idan avval, ya’ni 21-avgust kuni ijara markaziga shu mazmunda xat yozgani sabab bo‘lgan.
Tuman tasarrufidagi 2-sonli maktab oshxonasini ijaraga berish bo‘yicha 2024-yil 21-avgust kuni davlat mulkini ijaraga berish markaziga maktab direktori tomonidan xat bilan murojaat qilingan, deydi mas’ullar.
Qo‘shimcha qilinishicha, hozirda maktabgacha va maktab ta’limi vaziri topshirig‘i bilan barcha maktablarda oshxonalarni auksion orqali ijaraga berish to‘xtatilgan.
Izoh (0)