Toshkent shahrining Sergeli tumanidagi portlashdan so‘ng shahar hokimi Shavkat Umrzoqov hududdagi mavjud tuman hokimlariga portlashdan zarar ko‘rgan xonadonlar hamda ijtimoiy soha ob’yektlarini qisqa muddatda ta’mirlash kerakligi haqida topshiriq bergandi. “Daryo” ijodiy jamoasi shahar hokimi topshirig‘idan so‘ng, o‘tgan fursat davomida “Quruvchilar” mahallasida qanday ishlar amalga oshirilgani bilan qiziqib, mas’ullar hamda aholini suhbatga tortdi.
Yarim kecha uyquda yotganimizda katta portlash sodir bo‘ldi. O‘g‘limning oyog‘iga, kelinimning yuziga zarar yetgandi. Allohga shukr, chilladagi chaqaloqlarimizga hech narsa qilmadi. Kelinim va o‘g‘limni tez yordam mashinasida shifoxonaga olib borib, yordam ko‘rsatishdi. Hozir to‘rt muchamiz sog‘, oyog‘imizda yuribmiz, — deydi suhbatdosh Klara Do‘stova.
Suhbatdosh voqea sabab xonadon devorlari zararlanganini, eshik va deraza romlari o‘yilib tushganini, bugungi kunga kelib, mas’ullar uy ta’mirini boshlab yuborganini aytmoqda.
Deraza va eshik romlari zarbdan otilib ketgandi. Birorta sog‘ joyi qolmagandi. Bugungi kunga kelib, ta’mirlash ishlari boshlab yuborildi. Biz yashab turgan ko‘p qavatli uy Yakkasaroy tumani hokimligiga topshirilgan ekan. Hokim boshchiligidagi barcha rahbarlar kecha-yu kunduz shu yerda. Uyimizda ta’mirlash ishlari boshlab yuborildi. Eshik va deraza romlari yangilanmoqda. Davlatmiz bu darajada g‘amxo‘rlik qiladi deb kutmagandik, — deydi suhbatdosh.
Portlash sodir bo‘lgan hududdagi ko‘p qavatli uylarda yashovchi Salomat Safarovaning bildirishicha, portlash ovozi uyni larzaga solgan. Uni qo‘rqtib yuborgan.
Gumburlagan ovozdan uyg‘onib ketdim. Derazadan qarasam, olov sachrayapti. Qo‘rqqanimdan baqirib, farzandimni quchoqlab, eshik tomonga qochdim. Eshiklar qulab tushib, chiqish eshigi ochilmay qoldim. Ortimdan boshqa farzandlarim yugurib keldi. Judayam qo‘rqib ketdim. Amallab ko‘chaga chiqqach, qo‘rquvimiz bosildi, — deydi Dilshoda Avazova.
Uning aytishicha, aholiga yemak tayyorlash uchun har kuni qo‘ylar so‘yilmoqda.
Bu darajada e’tibor qaratiladi deb kutmagandik. Hamma joylar tozalanib, uylar ta’miri boshlab yuborildi. Yomon kayfiyatda yurgan qo‘shnimiz yo‘q. Har kuni uch mahal ovqat berishmoqda. Uyimizdagi singan oynalarni olib chiqib ketib, deraza va eshik oynalarini, romlarini almashtirishmoqda. Har kuni qo‘ylar so‘yilib, uch mahal ovqat berishmoqda, — deydi u.
Suhbatdoshlar yashovchi xonadonlar ta’miriga biriktirilgan Yakkasaroy tumani hokimi Anvar Sayfutdinovning aytishicha, hududda boshlagan ta’mir ishlari bugun, 29-sentyabr kuni yakunlanadi.
Odatga ko‘ra, shaharda biror bir ko‘ngilsizlik yuz bersa, mavjud 12 ta tuman hokimlari birikib, muammoni yechishga harakat qilamiz. Yakkasaroy tumaniga 269 ta xonadondan iborat 21-A uy biriktirildi. Har bir xonadon egasi bilan suhbatlashib, tibbiy yordam, psixologik ko‘mak berishga harakat qilyapmiz. Ko‘rilgan talafotlar aniqlanib, 26 ta xonadonda joriy va kapital ta’mir ishlari boshlandi. 5 ta xonadondagi ahvol yomonligi uchun kapital ta’mirlanmoqda. 21 ta xonadonda esa joriy ta’mir ishlari olib borilmoqda, — deydi Yakkasaroy tumani hokimi.
Hokimning aniqlashtirishicha, 21-A uy xonadonlaridagi 40 dan ortiq rom yangilanmoqda. 52 nafar fuqaroga tibbiy yordam ko‘rsatilgan. Bir nafar fuqaroning olgan tan jarohati og‘ir bo‘lgani bois jarrohlik amaliyoti o‘tkazilgan.
Portlashdan zarar ko‘rgan 4 ta xonadon vakillarining bolalari yoshligi, shuningdek, xonadoni bir xonali bo‘lgani uchun deraza oynalari sinib ketib, yashash uchun sovuqlik qilishi hisobga olinib, ular tumandagi mehmonxonalarning biriga vaqtincha yashash uchun joylashtirildi, — deydi tuman hokimi.
Anvar Sayfutdinovning qo‘shimcha qilishicha, Yakkasaroy tumaniga biriktirilgan hududga 10 ta brigada ishlamoqda.
Ikki kundan beri qozon qaynatganimiz yo‘q. Har kuni uch mahal ovqat bilan ta’minlashyapti. Olgan ovqatimiz ortib ham qolyapti. Sut va qatiq mahsulotlarigacha berishmoqda. Biz bunday e’tibordan juda xursandmiz, — deydi suhbatdosh.
O‘zini Ahmadjon aka deb tanishtirgan suhbatdosh portlashdan so‘ng, barcha zararni o‘zimiz qoplaymiz degan xayolda yurganini, ammo bugungi kunda nafaqat uy ta’miri, odamlarning uch mahali ovqati ham davlat mablag‘lari evaziga qilinayotganidan hayratda ekanini aytmoqda.
Barchaning boshiga tushgan musibat ekan. Lekin tez orada ko‘rmagandek bo‘lib ketamiz. Biz bu darajada e’tibor bo‘ladi deb kutmagandik. Barcha bundan xursand. Biz ta’mirlash ishlarini ham o‘zimiz qilsak kerak deb o‘ylagandik, hukumat nafaqat uy ta’miri, odamlarga uch mahal ovqat berib, barchaga g‘amxo‘rlik qilyapti. Barchasi uchun rahmat, — deydi Ahmad To‘raboyev.