O‘zbekistonda faoliyat yurituvchi hokimlar orasida eng yosh hokim sifatida tilga olinuvchi Toshkent shahrining Sergeli tumani hokimi Elbek Shukurov “Daryo” nashri bilan suhbatida ayni kunda jamoatchilikni qiziqtirgan ko‘plab savollarga javob berdi. U, shuningdek, “hokimlar pul yeb ketdi”, degan gap qanchalik to‘g‘riligaga, bugun aholi orasida boqimandalik kayfiyati paydo bo‘lishida hokimlarning ham aybi borligi haqidagi gap-so‘zlarga va Toshkent shahri hokimi Jahongir Ortiqxo‘jayev bilan ishlash qanchalik oson yoki qiyinligiga aniqlik kiritdi.
Suhbat avvalida Elbek Shukurov Sergeli tumaniga rahbar etib tayinlanganiga salkam uch yil bo‘lganiga, o‘tgan fursat davomida aholining yashash sharoitini yaxshilash maqsadida mahallalarda amalga oshirgan ishlari haqida to‘xtaldi.
Hurmatli prezidentimizning so‘nggi ikki yilda tumanlardagi mahallalarga bevosita mablag‘ ajrata boshlaganliklari mahallalarda aholining turmush tarzi yaxshilanishiga olib kelmoqda. Biz turgan “Madadkor” mahallasidagi ushbu ko‘chada 4 ta maktabda 10 ming nafardan ortiq o‘quvchi o‘qiydi.Tuman hokimining aytishicha, mahallalarda barpo etilayotgan piyodalar yo‘lakchasi va velosiped yo‘laklari qurilishi avvalida shaxsan o‘zi bosh-qosh bo‘lib, hatto nogironlar aravachasiga o‘tirgan holda piyodalar yo‘lakchasida nogironligi bo‘lgan fuqarolarga qanday qulaylik yaratilganini, ishning sifatini sinchiklab tekshirgan.300-sonli maktabda 6,5 ming nafar bola tahsil oladi. Bu maktab respublikadagi eng katta maktablardan biri hisoblanadi. Shu bilan birga hududda 2 ta maktabgacha ta’lim muassasasi bor.
Shu ta’lim dargohlari yig‘indisida ushbu ko‘chadan 15 ming nafar bola o‘tib-qaytadi. Bundan ikki yarim yil avval, endi ish boshlagan paytimizda mana shu ko‘cha juda tor va abgor holatda edi. Ko‘chada piyodalar yo‘lakchasi yo‘q edi. Farzandini maktabga, bog‘chaga olib keluvchi ota-onalar judayam qiynalar edi.
Bu esa bizni rosa o‘ylantirardi. Eng yomoni u paytda mahalliy budjet mablag‘lari taqchilligi bor edi. Davlat rahbarining aynan mahallalarga qaratgan e’tibori sabab bugun bu ko‘chada alohida piyodalar yo‘lakchasi qurildi. Velosipedlar harakati uchun yo‘laklar barpo etildi, — deydi Sergeli tumani hokimi Elbek Shukurov.
Qurilish boshida biror bir kamchilikni ko‘rsak, o‘sha paytning o‘zida bartaraf qildirdik. Hatto ishni bajaruvchilar bilan birga kerak bo‘lsa, nogironlik aravachasiga o‘tirib, o‘zimiz yo‘lda yurib ko‘rib, kamchiliklarini ko‘rsatib bordik. Odamlarning o‘zi ham ishimizni ko‘rib, bilib, o‘zlari ham shu tartibga o‘rgandi, — deydi hokim.Hokimning aytishicha, “Ziynat”, “Madadakor”, “Yangi Sergeli”, “Ezgulik” va “Sohibqiron” mahallalarida 181 ta ko‘p qavatli uy bo‘lib, 2022-yilda mazkur uylarning fasad qismi bo‘yalgan. Va hududdagi ko‘p qavatli uylar boshqaruvi “Hayot” nomli boshqaruv kompaniyaga o‘tkazilgan.
Ko‘p qavatli uylarning tashqi fasadini bo‘yash barobarida shu uylarda yashovchi aholining farzandlariga imkoniyat va sharoit yaratishga harakat qildik. Eski davrda qurilgan bolalar maydonchalari ta’mirtalab ahvolga kelib, judayam ko‘rimsiz bo‘lib qolgandi.Bugungi kunga kelib esa birgina “Madadkor” mahallasidagi ko‘p qavatli uylar oldida 11 ta bolalar maydonchasi va yoshi kattalar uchun sport bilan shug‘ullanuvchi maxsus joylar qurildi. Bu albatta, aholiga yaxshi kayfiyat ulashmoqda, — deydi hokim.Hokimning qo‘shimcha qilishicha, tumandagi mavjud 46 ta mahallaning barcha ko‘chalari ta’mirlanib, aholi uchun qulay sharoit yaratilgan.
O‘zimiz uchun alohida konsepsiya ishlab chiqib, barcha ko‘p qavatli uylar oldida bolalar maydonchasi, sport maydonchasi, avtomobillar va piyodalar uchun bir-biriga xalal bermaydigan yo‘lak, avtomobillar uchun turar joy bo‘lishi kerak degan rejani qo‘ydik va aynan shu reja bo‘yicha ishladik, — deydi u.
Elbek Shukurovning aytishicha, 2022-yil Sergeli tumani tarkibiga Toshkent viloyatining Zangiota tumanidagi 13 ta mahalla qo‘shib berilgan va 2022-yilda aynan shu 13 ta mahallani obod qilishga kuch va mablag‘ sarflangan.
Zangiota tumanidan hududimizga o‘tkazilgan 13 ta mahallada qilingan asfaltlashtirish ishlari yaqin besh yil ichida butun Sergeli tumanidagi yo‘llar asfaltini umumlashtirganda ham ulardan ko‘p bo‘lsa kerak. Boisi, aynan shu mahallalarda ta’mirtalab ko‘chalar ko‘pligi bois, joriy yil aynan shu 13 ta mahallaga alohida e’tibor qaratdik, — deydi Elbek Shukurov.
Sergeli hokimining aytishicha, joriy yil davomida hududlardagi mahallalarda 1,5 ming dona elektr ustun o‘rnatilgan. 6 ta mahallaga zamonaviy bino qurib berilgan. “Madadkor” mahallasida joylashgan va har yili bitiruvchilarining 82,6 foizi talabalikka qabul qilinuvchi maktab kapital ta’mirdan chiqarilgan.
Hokim Sergeliga rahbarlik faoliyati avvalida unga tumanning 7 ta eng og‘ir muammosini sanab, ularning yechimi bilan shug‘ullanishi kerakligi haqida topshiriq berilganini, mazkur muammolarning barchasiga ayni kunda yechim topganini, ammo o‘zi kashf qilgan muammolar orasida hamon yechishga ulgurmaganlari borligini aytmoqda.
Bilasiz, Sergeli tumanida suvni tozalash inshooti bor. Shu sabab o‘sha yerdan badbo‘y hid chiqadi. Bu xususida aholida juda ko‘p shikoyatlar bor edi. Bugungi kunga kelib, hidni kamaytirish yoki umuman hidni yo‘qotishga ulgurdik. Ayni kunda bu borada aholida shikoyatlar kamaydi. Shuningdek, Toshkent shahrining qoq markazidagi Yakkasaroy tumaniga chegaradosh hududdagi kanalizatsiyasi bo‘lmagan mahallalarga kanalizatsiya tortildi.Yana bir eng katta muammolardan biri — Sergeli tumanidagi 12 yildan beri qarovsiz yotgan parkni qayta tiklash imkoni yaratildi. Yangi yo‘l qurildi, qolaversa metro keldi. Xullas, dastlab faoliyatim boshlangan paytdagi 7 ta muammoga to‘liq yechim topdik. Ammo o‘zimiz kashf qilgan muammolarning haligacha yechilmaganlari bor. Biroq to‘xtab qolmaganmiz, — deydi hokim.
Sergeli hokimi so‘nggi paytlarda ko‘pchilik tilidan yangrayotgan hokimlar pul yeb ketyapti degan gapga ham to‘xtaldi.
So‘ngga besh yilda prezidentimiz shunaqa tizim yaratib berdiki, budjetdan orttirib bajarilgan mablag‘ni erkin qoldik sifatida tumanning o‘zida qoldirishni yo‘lga qo‘ydi. Endi hokimliklar ixtiyorida ham mablag‘lar paydo bo‘ldi. Lekin bu mablag‘lar sarfini ham shu darajada chiroyli belgilab berdilarki, qoldik mablag‘larni ham joy-joyida sarflash, barchasini aholi manfaatiga yo‘naltirishni belgilab berdi.Bu mablag‘larni sarflashda chetga chiqish imkoniyati yo‘q. Barchasi belgilangan tartibda amalga oshirilmoqda. Ko‘pchilik aytadi, hokimlar pul yeb ketyapti deb, ishoning, prezidentimiz yaratib bergan tizimda hokimlarning pul yeb ketishi umuman imkonsiz, — deydi u.
Izoh (0)