Tailandlik milliarder va qirollikning sobiq bosh vaziri Taksin Chinavat monarxiyani haqorat qilish ishi bo‘yicha oqlandi. The New York Times gazetasi xabar berishicha, siyosatchiga 15 yilgacha ozodlikdan mahrum qilish jazosi tahdid solayotgan edi.
Gazeta ma’lumotlariga ko‘ra, siyosatchidan ayblov olib tashlangan bo‘lsa-da, u va uning oilasi hamon huquqiy tahdidlarga duch kelmoqda.
Chinavat tergov paytida qamoqqa tushishdan qutulib qolgan, chunki u shifoxonaning VIP xonasida davolangan.
May oyida Chinavat intervyuda mamlakat qiroli Vajiralongkorn (Ramu X)ni haqorat qilgani uchun sudga tortildi. Ayblov tomonining ta’kidlashicha, Chinavat Janubiy Koreyaning “Choson ilbo” gazetasiga bergan intervyusida monarxiyaning obro‘siga putur yetkazgan. O‘shanda u Maxfiy kengash (Tailand qiroli huzuridagi maslahat organi) a’zolari 2014-yil 22-maydagi davlat to‘ntarishini qo‘llab-quvvatlaganini, natijada sobiq bosh vazirning singlisi Yinglak Chinavat boshchiligidagi hukumat ag‘darilganini aytgan.
2006-yilda o‘z hukumatini ag‘dargan harbiy to‘ntarishdan so‘ng mamlakatni tark etgan Chinavat 2023-yilda Tailandga qaytdi va qamoqqa olingandi. Ta’kidlanishicha, harbiy to‘ntarishdan keyin Chinavat vatanida korrupsiya va hokimiyatni suiiste’mol qilishda ayblanib, qamoq jazosiga hukm qilingan edi.
May oyida Tailandning Oliy ma’muriy sudi ixtiyoriy ravishda chet elda yashayotgan sobiq bosh vazir Yinglak Chinavatni fermerlarni subsidiyalash bo‘yicha muvaffaqiyatsiz dasturi tufayli davlatga yetkazilgan katta zarar uchun 10 milliard batdan ortiq (taxminan 305 million dollar) to‘lash majburiyatini yuklagandi. U 2017-yilda xizmat vazifasiga sovuqqonlik bilan qaragani uchun 5 yilga qamalgan edi.
Izoh (0)