Dunyoda gilam ishlab chiqarish bo’yicha top-3 da turadigan kompaniya TAF!24 festivalida rebrending taqdimotini o’tkazdi. Loyiha konsepsiyasini Depot brending agentligi ishlab chiqqan.
SAG — mashhur gilam ishlab chiqaruvchi korxona bo‘lib, xomashyo va iplar tayyorlashdan tortib, tayyor mahsulotgacha bo‘lgan barcha jarayonlarni o‘zi amalga oshiradi. Bugungi kunda SAG o‘z sohasida dunyoda top-3 talikdan o‘rin egallab kelmoqda. Xalqaro bozorlarga global kengayish yo‘lida SAG o‘z brend-pozitsiyasini va aydentikasini yangilamoqda.
SAG yangicha qarashlariga ko‘ra, ushbu brend endi nafaqat o‘z sohasida, balki butun bozorda ham yangi darajani belgilab berishga intiladi.
SAG jamoasi ta’kidlaganidek: “Yangi pozitsiyalanish va rebrending — bu bizning bozorni o‘zgartirish va barcha yo‘nalishlarda, jumladan, mahsulot, kommunikatsiya hamda mijozlarimizning xarid tajribasini yangi darajaga olib chiqish yo‘lida qilgan birinchi qadamimizdir. Biz O‘zbekistonni butun dunyoga tanitadigan brendga aylanishni o'z oldimizga maqsad qilganmiz”.
Depot jamoasi loyiha haqida so‘zlab, aydentika konsepsiyasining asosida an’analarni saqlab qolish va ularni zamonaviy talqin qilish, shuningdek, bugungi kun kontekstida dolzarb bo‘lgan usullarni yangi darajaga olib chiqish g‘oyasi yotganini ta’kidlab o‘tdi.
“Logotip uchun biz turli xil harflar va stilistik uslublarni o‘zida mujassam etuvchi noyob shrift yaratdik. Harflarda paydo bo‘ladigan uchburchak shaklidagi elementlar shriftga zamonaviy va geometrik ko‘rinish beradi. Shu bilan birga, yozuv va grafik elementlarini o‘zaro bog‘laydi va gilamlarning nafaqat funksional, balki estetik va dekorativ ahamiyatini ham yodga soladi”.
Bir-biriga qaragan “s” va “a” harflari ritmik uyg‘unlik hosil qilib, an’anaviy gilam naqshlaridagi dekorativ elementni eslatadi. Ranglar palitrasi yorqin ko‘k rang asosida shakllangan bo‘lib, u brendning mavjud rang sxemasi bilan bog‘langan va bej ranglar bilan uyg‘unlashgan. Bu ranglar uyg‘unligi kompaniyaning vatani — Samarqandning me’moriy va tabiiy ranglar uyg‘unligini yodga soladi.
Brendning kengaytirilgan ranglar palitrasi ko‘plab yorqin ranglarni o‘z ichiga oladi, bu esa brend grafikasi va mahsulot dizayniga rang-baranglik baxsh etadi. Stilistik grafika doimiy harakatda bo‘lib, texnologiyalar bilan hamnafas rivojlanayotgan assortimentning uzluksiz yangilanishi va xilma-xilligini aks ettiradi. Maxsus grafika turli naqshlardan tikilgan matolardan tashkil topgan bo‘lib, Buyuk Ipak yo‘lining O‘zbekiston gilam to‘qimachiligi rivojiga bo‘lgan katta ta’sirini ham ifodalaydi.
SAG rebrending jarayonini allaqachon boshlagan: brend o‘z do‘konlarini yangilash ishlariga kirishdi — masalan, hozirda yangi SAG XL Sergeli do‘koniga tashrif buyurish mumkin. Shuningdek kompaniya endilikda boshqa mamlakatlardagi savdo nuqtalari ham shu tarzda bosqichma bosqich yangisini rejalashtirgan.
Izoh (0)