“O‘g‘lim duolarida menga juft so‘raydi”. Dilnoza Kubayeva to‘yi haqidagi orzulari va “chillada” ekani haqida

Aktrisa Dilnoza Kubayeva “Milliy” telekanaliga bergan qisqa intervyusida shaxsiy hayoti bilan bog‘liq savollarga javob berdi.

To‘y bilan bog‘liq armoningiz bormi?

— O‘zim ko‘p to‘ylarda qatnashganimda, Xudo xohlasa, ko‘nglimdagi insonni uchratib, turmushga chiqsam, bu safar mana shunaqa bo‘ladi, deyman. O‘zimni rosa bekitib qo‘yganman, ochilishga qiynalaman. Boshqalarga bu g‘alati tuyulishi mumkin: Lekin bu galgi to‘yim xuddi birinchi marta turmushga chiqayotgandek bo‘lishini xohlayman. Baland bo‘yli o‘g‘lim yonimda turib, men bilan turmush o‘rtog‘im bilan raqsga tushishini xohlardim. San’atkorlar navbati tiqilinch bo‘lishini emas, hamma narsa ko‘ngil uchun, ruhiy ozuqa uchun bo‘lishini xohlardim.

“Chilladaman”

— O‘zim murakkab insonlar toifasiga kiraman. Kulib yurganim bilan ichimda nima g‘alayonlar, chaqmoqlar bo‘ladi, bu o‘zimga ayon. Balki shuning uchun ham ijodkor bo‘lgandirman. Shuning uchun ham bu beshafqat katta maydonda bordirman. O‘zimni o‘raganman, doim karantindaman. O‘zimni doim chillada saqlagandek saqlayman. Chunki men gardanida ancha-muncha vazifalari bor ayol deb bilaman, chunki davlat ishida ishlayman, onaman, farzandman.

O‘g‘li uning yana oila qurishiga qanday qaraydi?

— Oldin bu haqda qo‘rqinchli gaplar gapirardi. Hozir esa duolarida so‘raydi. Chunki dinimizda ham farzandning ota-onasiga jufti halolli bo‘lishiga yordam berishi kerakligi. Farzandimning shuni tushunib, anglab yetganidan xursand bo‘laman. Men hozir judayam mustaqil, xotirjam ayolman. Chunki kichkinagina qo‘rg‘onimni, kasbimni yaxshi olib boryapman. Bir kunim yo‘qki, biron narsa o‘qimasam, yoki yodlamasam. TVda har kuni ko‘rinmaganim bilan ijodda yo‘q bo‘lib ketganim yo‘q. Endi qarangki, kimgadir, o‘ylamasdan, ko‘r-ko‘rona kimgadir tegsam-u, bor-budimdan ayrilib qolsamchi, deb o‘ylayman, yutqizishdan qo‘rqaman.