Kinoda yarq etib ko‘ringan va keyin “yo‘qolib qolgan” aktrisalar (foto)

Kino olamida yarq etib ko‘zga ko‘ringan-u, qandaydir sabablar bilan ko‘rinmay qolgan ijodkorlar ko‘p. Aslida, ko‘pchilik erishgan muvaffaqiyatini davom ettirishni istaydi. Ammo boshiga qo‘ngan omad qushini ushlab qolishni istamaydiganlar ham bor.

“Seni izlab”dagi Nargiza

1989-yili o‘tkazilgan “O‘zbekiston malikasi” tanlovida g‘olib bo‘lgan Nargiza Olimova ham raqqosa sifatida elga tanilgan. U 1991-yili birinchi marta bo‘lib o‘tgan Mustaqillik bayramida “Humo qushi” raqsini ijro etadi. Davlat tadbiridagi raqsi bilan ham muxlislar orttiradi.

1991-yil shoira va adiba Saida Zunnunovaning “Go‘dak hidi” hikoyasi asosida suratga olingan “Seni izlab” filmi uchun o‘tkazilgan kastingda qatnashadi. Lola Eltoyeva, Raʼno Zokirova, Madina Muxtorova kabi ko‘plab aktrisalar ishtirok etgan sinovdan omadli o‘tib, rolga tasdiqlanadi. Bu rol uni aktrisa sifatida xalqqa tanitadi.

Nargiza Olimova aktrisalikni davom ettirmagan bo‘lsa-da, madaniyat sohasida ishlaydi.

“Ko‘ngil ko‘chalari”dagi Suqsur

Aktrisa Go‘zal Fayziyeva 27 yil avval efir yuzini ko‘rgan “Ko‘ngil ko‘chalari” serialida Suqsur roli bilan tomoshabinlar eʼtiborini qozongan.

— Aslida, Suqsur ilk rolim emasdi. Institutning 3-kursida tahsil olayotganimda Tolib Hamidov rejissyorligidagi “Qabrdagi xazina” nomli 4 qismli videofilmda asosiy qahramon Dilorom rolini ijro etganman. Uchinchi kursda o‘qiyotganimda satira teatriga ishga qabul qilindim. Orada bir necha yil ishlab, bolalikdagi orzularimni ro‘yobga chiqarish uchun O‘zbek davlat drama teatri (Yosh gvardiya)ga ishga o‘tdim. “Ko‘ngil ko‘chalari” serialiga taklif etilganda teatr aktrisasi edim.

Aktrisa bu rolidan keyin deyarli kinoda suratga tushmadi. U bor eʼtiborini teatrdagi faoliyatiga qaratdi.

“Muhabbat sinovlari”dagi Ruxshona

“Muhabbat sinovlari” filmidagi Ruxshona roli bilan tomoshabinlarga yaxshi tanish bo‘lgan Lobar Polvonova negadir aktrisalik faoliyatini davom ettirishni istamadi. So‘nggi rolini 2006-yili “Hayot-mamot” filmida ijro etdi. U 2005-yildan buyon Alisher Navoiy nomidagi O‘zbekiston davlat akademik katta teatrida liboslar bo‘yicha rassom bo‘lib ishlab kelmoqda. “Alisher Navoiy” spektakli va “Faust” operasi uchun yaratgan liboslari tomoshabinlar eʼtirofiga sazovor bo‘ldi.

Negadir u omma eʼtiborida bo‘lish va aktrisalik faoliyati haqida intervyu berishni istamaydi. Shaxsiy hayoti bilan bog‘liq maʼlumotlarni ham sir saqlaydi.

“Tubanlik” filmidagi Dilroz

Asli farmatsevtika sohasida tahsil olgan Ziyoda Xudoyqulova kichik tasodif sabab kino olamiga kirib qolgan. Rejissyor Hilol Nasimov Lola Eltoyevaga o‘xshashligi sabab uni “Tubanlik” filmiga taklif etgan. Film katta muhokamalarga sabab bo‘ldi va aktrisaga ikkinchi filmda ham rol ijro etish baxti nasib etdi. U Alisher Uzoqovning “Kuzda gullagan daraxt” filmida suratga tushdi.

Bundan tashqari, u Shahzodaning “Shunchaki”, “Men o‘sha”, Oybek va Nigoraning “Xavotirdaman” kliplarida ham suratga tushgan. Oilali bo‘lgach, sanʼatni butunlay tark etdi va farzand tarbiyasi bilan band.

“Kichkina tabib”dagi Shahnoza

O‘zbekiston xalq artisti Saida Mansurxo‘jayeva 16 yoshida reklama roligida suratga tushadi. Ammo bu loyihadagi ishtiroki omadsiz chiqadi. Biroz vaqt o‘tib, aniqrog‘i, 1996-yilda rejissyor Po‘lat Fayziyev “Marg‘iyona” filmiga taklif etadi. Kartinadagi roli unga omad olib keladi va 1998-yil Zulfiqor Musoqovning “Kichkina tabib”ida Shahnoza rolini o‘ynaydi.

Saida Mansurxo‘jayeva 2006-yilda yaratilgan “Go‘zallik siri” filmidagi rassom qiz roli orqali aktrisa sifatida yanada taniladi. Uning qahramoni Laylo mashhur rassom va dizaynerga aylanib, Fransiyadagi xalqaro ko‘rgazmada ishtirok etadi va shuhrat qozonadi.

Oradan ancha vaqt o‘tib, “Mehmonxona” serialida ham suratga tushgan ijodkor “Saida” nomli professional raqs maktabida yoshlarga raqs sirlarini o‘rgatib kelmoqda.

“Jurnalist” serialidagi Umida

2019-yili efirga uzatilgan “Jurnalist” seriali ko‘plab yosh ijodkorlarni xalqqa tanitdi, desak mubolag‘a bo‘lmaydi. Shulardan biri — Madina Nig‘matullayeva. Serialda Umida rolini ijro etgan Madina aslida hayotda muxbir sifatida faoliyat yuritardi. Unga serialdagi ishtiroki ko‘proq omad olib keldi.

Ammo u aktrisalikni davom ettirishni istamadi. Oila qurgach, bor eʼtiborini psixologiya sohasiga qaratdi. Hozirgi kunda uning psixologik markazi bor. U sportchi aktyor Mahmud Tursunov bilan oila qurgan, ularning bir qizi bor.

“Yodgor”dagi Sanobar

Hilol Nasimov rejissyorligidagi “Yodgor” filmi 2003-yilda suratga olingan. Unda Sanobar rolini ijro etgan Kamola Umarxo‘jayeva esa shu rolidan keyin AQSHga ko‘chib ketgan va undan keyin birorta filmda suratga tushmagan.

— Amerikaga 2004-yilda til o‘rganish uchun kelganman. Bu mamlakatga kelganimda ingliz tilini umuman bilmasdim. Noldan boshlab o‘rganganman. Keyin turmush qurdim, farzandli bo‘ldim. Ikki farzandli bo‘lganimizda turmush o‘rtog‘im bilan ajrashdik. U bilan hozir ham do‘stona munosabatdamiz. Keyin ikkinchi marta oila qurdim. Hozirgi turmush o‘rtog‘im suriyalik. Ular ancha yillar oldin AQSHga ko‘chib kelgan. U shu yerda ulg‘aygan. Hozirda uch o‘g‘il va bir qizim bor, — deydi Kamola Umarxo‘jayeva.

“Tohir va Zuhra” filmidagi Zuhra

“Tohir va Zuhra” musiqiy filmi 1999-yilda suratga olingan. Unda bosh rollarni Tohir Sodiqov (Tohir) va Parizoda Bo‘rixo‘jayeva (Zuhra) ijro etgan.

Kartinada Zuhra obrazini yaratgan aktrisa Parizoda Bo‘rixo‘jayeva kino sohasidagi muvaffaqiyatidan so‘ng Doston Ubaydullayevning “Tug‘ilgan kuning”, “Yagonam” kabi kliplarida suratga tushgan. Shundan so‘ng tomoshabinlar aktrisani boshqa birorta klip yoki filmda ko‘rmadi.

— “Tohir va Zuhra” filmida rol ijro etganimda 14-15 yoshda edim. Kinoga kirib kelishim tasodifan yuz bergan. Hech qachon aktrisa bo‘laman, deb o‘ylamasdim. U paytgacha bir nechta qo‘shiq aytgan edim, shou-biznesga qiziqardim. Umuman olganda, sanʼat men uchun begona emasdi. Otam Alisher Eshonxo‘jayev katta davlat bayramlarida rejissyor bo‘lganlar. Shuning uchun yoshligim sahnada, studiyada o‘tgan desam, mubolag‘a bo‘lmaydi. Shuning uchun sanʼat meni o‘ziga rom etgan.

Sahnaga chiqqanimda rejissyorlar meni ko‘rib, shu qiz to‘g‘ri keladi, deb o‘ylashgan. Filmga juda katta kasting bo‘lgan. Lekin men borgan kunim o‘sha kunning o‘zidayoq bu rolga meni tanlashgan, deydi u.

Parizoda Bo‘rixo‘jayeva ayni kunda fotograf va teleboshlovchi sifatida faoliyat yuritmoqda.

“Anora” filmidagi Anora

Aktyor Murod Rajabov 2006-yili “Anora” nomli filmni suratga oladi. Film onasi o‘limidan keyin ko‘plab qiyinchiliklarga uchragan Anora haqida. Rolga debyutant aktrisa Fotima Vohidova tanlab olinadi.

— Bolaligimdan Yulduz Usmonovaga havas qilib kelaman, O‘zbekiston davlat konservatoriyasida o‘qiyman, derdim. Maktab tadbirlarining birida mashhur sanʼatkorlar davrasida qo‘shiq kuylab qoldim. Ular orasida Murod Rajabov ham bor edi. Tabiatan juda sho‘x qiz edim, ustozlarga ham Konservatoriyaga kirishni xohlashimni aytdim. Shunda Murod Rajabov musiqadan, notalardan xabarim bor-yo‘qligi haqida so‘rab, aktyorlik sohasidan ketishimni maslahat berdi. Ustozning maslahati bilan 11-sinfni tugatib, dadam bilan Toshkentga keldik.

O‘zbekiston Sanʼat va madaniyat universitetiga o‘qishga kirdim. O‘zbekiston xalq artisti Turg‘un Azizovning aktyorlik kursiga qabul qilindim. Avvaliga “Qirq tog‘oraning qirq nog‘orasi” kabi seriallarda kichik epizod rollarni o‘ynab yurdim. Bir kuni Murod Rajabov institut yo‘lagida ko‘rib, film suratga olayotgani haqida aytib, kastingga borishimni so‘radi. Ishonsangiz, borgim kelmadi, sababi chiroyli aktrisalar ko‘p edi, baribir qabul qilishmaydi, deb o‘yladim. Lekin ustozning ra’ylarini qaytarmay, kastingga borib, qo‘shiq kuylab berdim. Kastingda chiroyli aktrisalar ishtirok etgandi, rolga tasdiqlanishimga ishonmadim. Ammo bir haftadan keyin rolga tasdiqlanganimni aytishdi. “Meni tasdiqlashmagan, shunchaki hazillashishdi”, deb bir haftagacha ishonqiramay yurdim, deydi aktrisa.

Fotima Vohidova turkiyalik yigit bilan oila qurgan. Ularning qizalog‘i bor.

“Tutash taqdirlar”dagi Raʼno

2009-yilda ekran yuzini ko‘rgan “Tutash taqdirlar” serialida raqqosa qiz Raʼno rolini ijro etgan debyutant Nafisa Mamadiyorovaga mazkur loyiha chinakam mashhurlik olib kelgan.

— “Tutash taqdirlar”da rol o‘ynashim juda qiziq kechgan. Hamma qizlar serialda suratga tushishga intilsa, men biror marta ham orzu qilmaganman. Farg‘ona davlat sanʼat bilim yurtini bitirib, O‘zbekiston Qurolli kuchlar ansamblida raqqosa bo‘lib ishlardim. Bir kuni ustozim Ziyoda Madrahimovaning oldiga rejissyor Zamira Begimqulova kelib, rol uchun raqqosa qiz izlayotganini aytibdi. Shunda ustozim “Mayli, qizlarni ko‘ring, mos kelganini aytarsiz”, debdi. Zamira opa ancha vaqt mashg‘ulotimizni ko‘rib, keyin Ziyoda Madrahimovaga mening tashqi ko‘rinishim maʼqul kelganini taʼkidlagan. Ziyoda opa kulib, “Men ham sizga Nafisani tavsiya qilmoqchi edim”, degan ekan. Rosti, serialda suratga tushishni umuman istamadim. Shunda ustozim, “Men yoningda bo‘laman, raqqosa qizning ichki kechinmalarini ochib berishing kerak”, deb tushuntirgandan keyin rolga rozi bo‘lganman.

Suratga olish jarayonlari oson kechmagan. Hayotda otasiz o‘sganim uchun ota bilan qiz o‘rtasida qanday munosabat bo‘lishini bilmasdim. Shu bois marhum sanʼatkor Hoshim Arslonovni biroz qiynab qo‘yganman. Keyin yig‘lash sahnalari qayta-qayta suratga olinishiga to‘g‘ri kelgan, deydi u.

Ayni damda u harbiy ansamblda raqqosa sifatida ishlaydi, ammo kino va seriallarda suratga tushishni istamaydi.

“Panoh”dagi Gulnoza

“Panoh” filmidagi va Ozoda Nursaidovaning “Yor-yor” klipidagi ishtiroki bilan tomoshabinlarga yaxshi tanish bo‘lgan aktrisa Muborak Ashurboyeva ham san’atni butunlay tark etgan. Bizdagi ma’lumotlarga ko‘ra, aktrisaning to‘rt nafar farzandi bor va turmush o‘rtog‘i uning san’at sohasida faoliyat yuritishini istamaydi.