7-aprel kuni gonkonglik aktyor, ssenariynavis, rejissyor, operator, musiqachi, kaskadyor, jang san’ati ustasi va shunchaki ijobiy tomoshabin Jeki Chan 70 yoshga to‘ldi. Faoliyati davomida u 140 dan ortiq loyihalarda ishtirok etgan. Ularning hammasini ham yodga ololmasak-da, dam olish kunlari tomosha qilish uchun eng yaxshi filmlarni tavsiya qilamiz.
“Ko‘chma gazakxona” (18+)
Barselonada yashovchi oshpaz aka-ukalar notanish qizni himoya qilib, butun boshli jinoiy to‘daga qarshi kurashishga to‘g‘ri keladi.
Bu Jeki Chan afsonaviy kikboksing chempioni Benni Urkides bilan jang qilgan birinchi filmdir. Mutaxassislar bu jangni hali ham kino tarixidagi eng yaxshi janglardan biri deb bilishadi. Chan va Urkides ikkinchi marta “Mangu ajdarlar” filmida jang qilgan.
“Politsiya hangomalari” (18+)
Jeki Chan Chen Chi Xva bilan hamkorlikda suratga tushgan yana bir jangovar film aktyor ijodidagi muhim bosqichdir. Birinchidan, “Politsiya hangomalari” haqiqiy franshizaga aylandi. Ikkinchidan, suratga olish jarayonida shunchalik ko‘p kaskadyorlar jarohatlanganki, Chan o‘zining kaskadyorlar guruhini tashkil qilib, ularga o‘zi maosh to‘lagan. Film “Eng yaxshi jangovar rejissyor” uchun nufuzli Gonkong kino mukofotini qo‘lga kiritadi.
Syujet Kevin ismli politsiyachi atrofida qurilgan, u asosiy guvoh — giyohvand moddalar savdosi bilan shug‘ullanadigan mafiya boshlig‘ining kotibasi Chini himoya qilishi kerak. Mafiya rahbari esa qizdan qutulish uchun uning iziga tushgan.
“Tig‘iz vaqt” (18+)
Keyinchalik Jekining karyerasida “Bronksdagi mushtlashuv” (18+) va “Men kimman?” (18+) filmlari paydo bo‘ldi, lekin Brett Ratnerning Jeki Kris Taker bilan birga o‘ynagan ekshn filmi aktyor muvaffaqiyatini yana bir bor mustahkamladi. Aktyorlar MTV telekanalining “Eng yaxshi ekran dueti” mukofotiga sazovor bo‘lishdi.
Syujetga ko‘ra, inspektor Li Xitoy konsulining qizi o‘g‘irlab ketilgan Los-Anjelesga uchishga majbur bo‘ladi. Mahalliy politsiya Liga sherik qilib qo‘lidan tayinli ish kelmaydigan xodim — mahmadona Karterni tayinlaydi, u xitoylik inspektorni qizni qutqarishdan chalg‘itishi kerak, ammo yangi sheriklar tez orada garovga olingan qizning iziga tushadi.
Yaqinda “Tig‘iz vaqt”ning to‘rtinchi qismi e’lon qilindi. Uning qachon chiqishi noma’lum, ammo Chan va Taker o‘z rollariga qaytadi.
“Shanhay ritsarlari” (18+)
Kung-fu elementlariga ega vestern juda kam uchraydi, lekin bunday shou Mayls Miller va Alfred Gof suratga olgan filmda mavjud bo‘lib, unda Jeki Chan Ouen Uilson va Lyusi Liu bilan birga o‘ynaydi.
Yana bir o‘g‘rilik fitnasi — endi Xitoy malikasi Yovvoyi G‘arbda g‘oyib bo‘ladi va qudratli jangchi Chong Vang uni qutqarishni o‘z zimmasiga oladi. Amerikaning qoq markazida u yaqinda o‘z to‘dasidan ayrilgan firibgarni uchratadi. Aynan ular yovuzlarni to‘xtatib, malikani qutqarish uchun bel bog‘laydi.
“Chet ellik” (18+)
Jeki Chan va Pirs Brosnan Martin Kempbellning jangovar filmida birga ishtirok etgan. Chan mazkur filmda haqiqiy qasoskor rolini o‘ynaydi — terakt natijasida qizidan ayrilgan vyetnamlik urush faxriysi. Rasmiylar bosqinchilarni topa olmaydi, shuning uchun g‘azablangan ota ishni o‘z qo‘liga oladi.
“Kung-fu tulpor” (18+)
Qashshoq kaskadyor kino ustaxonasidagi sodiq hamkasbi — otni qutqarish uchun haqiqiy internet yulduziga aylanishga majbur bo‘lgan Jeki Channing eng so‘nggi, ehtimol, eng samimiy filmi.
Chan yoshini ochiq tan olgan va yashagan yillari haqida fikr yuritadigan film. U kaskadyorliklarni, muvaffaqiyatsizliklarni va g‘alabalarni eslaydi. Ta’sirchan tomoshabinlar film davomida ko‘z yoshlarini tiya olmaydi.
Izoh (0)