Куни кеча муҳташам “Халқлар дўстлиги” саройида юртимизнинг барча санъаткорлари жамулжам бўлди. 1998 йилдан бери ўтказиб келинаётган ва бир муддат тақиққа учраган ушбу тадбирда кўзга кўринган санъат ва маданият вакиллари, спорт ва сўз усталари ҳамда илм-фан ҳомийлари муносиб тақдирланади. Қизил йўлакча, мухлислар, олқиш-у эътирофдан санъаткорлар мамнун бўлди, бу эса кечанинг ажойиб кайфиятда ўтишига катта ҳисса қўшди.
Тадбир қизил йўлакчадан бирин-кетин эл ардоғидаги спортчи ва санъаткорларнинг ўтиши билан бошланди. Санъат саройига кириб келган ҳар бир меҳмонни тадбир ташкилотчилари ва мухлислар қарсаклар билан кутиб олди.
Тадбирни истеъдодли бошловчилар Нилуфар Сотиболдиева, Жамшид Умрзоқов ва Ситора Фармонова олиб борди.
— “Ҳар йили бўладиган ушбу анжуман жуда гўзал тарзда ўтади. Одамлар буни орзиқиб кутади, сабаби севган санъаткори ўзининг ижоди, чиқиши билан уларнинг кўз ўнгида намоён бўлади. Бундай тадбирлар давомий бўлиши тарафдориман. Албатта, ташкиллаштиришда жуда катта меҳнат турибди. “Замин юлдузлари” ҳозирда энг керакли анжуманлардан бири. Режиссёр Саъдуллахонга раҳмат, бундай тадбирларни ўтказишдан чарчамасин. Бугун мустақиллигимизга бағишланган “Ўзбек келаётир” номли қўшиғимни халқимиз билан ижро этаман”, дейди 73 ёшни қаршилаган санъаткор Ғуломжон Ёқубов.
— “ ‘Замин юлдузлари’да илк бор иштирок этишим. Кеча ажойиб ўтяпти, айниқса, қизил йўлакча менга жуда ёқди. Шундай буюк устозлар билан бир йўлакчадан ўтганимдан фахрланяпман ва бир оз хижолатдаман ҳам. Ҳаяжонимнинг чеки йўқ. Ижодим борасида янгиликлар бор, бу ойда иккита янги қўшиғим чиқади. “Анора” номли сериалда ҳам рол ижро этяпман, ҳозир суратга олиш ишлари билан бандман. Йил якунига қадар эътиборимни кўпроқ мусиқага қаратаман”, деди блогер Юнетта Акопян.
Дуэт куйлаш имкони бўлса, қайси хонандалар билан куйлашни истайсиз деган саволга Юнетта қуйидагича жавоб берди:
— “Лола ва Муниса Ризаева билан. Яна Шоҳруҳ рэпер ва Шаҳриёр ҳам жуда ёқади. Агар овозим тўғри келиб, улар билан қўшиқ айтсам, катта орзуларимдан бири амалга ошган бўларди”, дейди ҳаваскор хонанда.
— “Ғоя муаллифи режиссёр Саъдулла Абдуллаев яхши ишга қўл урган. Чунки она заминнинг барча санъаткорлари бир жойда жамулжам бўлиши тарихда қоларли воқеа. Аллоҳнинг назарига тушган юртимиз доим тинч бўлсин, осойишта мамлакатга мана шундай тадбирлар, хурсандчиликлар ярашади. Бу ерда қўшиқ айтишдан ҳам бурун мухлислар, ҳамкасблар билан дийдорлашгани келамиз. Шунинг ўзи саҳнада қўшиқ айтишдан-да ортиқ бахт”, деди Абдулла Қурбонов.
Меҳмон сифатида нафақат санъаткорлар, балки таниқли блогерларнинг ҳам таклиф этилиши тадбирга ўзгача файз қўшди. Мухлислар севимли ижодкорлари билан суратга тушиш бахтига муяссар бўлди.
Ҳали ҳануз гўзаллигини йўқотмаган Раъно Шодиева саҳнага чиққанида, устоз санъаткорлардан бири “Бу Раънонинг ўзими ё қизими?”, дея ҳазиллашиб, актрисага илиқ тилаклар билдирди.
Тўлиқ репортажни YouTube’даги “Daryo Lifestyle” каналида томоша қилинг.
Изоҳ (0)