“Kim kimga mos ekanligini o‘zimiz bilamiz”. Bobur Mansurovning rafiqasi aktyor bilan qanday tanishgani haqida so‘zlab berdi

Aktyor va vayner Bobur Mansurovning rafiqasi Fariza Oripovna Instagram’dagi sahifasida kuzatuvchilarini qiziqtirgan savollarga javob berdi.  

— Tanishuvlaringiz qanday bo‘lgan?

— Tanishganimizga 7-8 oy bo‘ldi. Xonsaroy Music loyihasiga qiziqib, tomosha qilish uchun borgandim. O‘sha paytda tanishib qolganmiz. Qolgani taqdirning ishi.

— Qayerdansiz va nechanchi yilsiz?

— 2000-yilda Qashqadaryoda tug‘ilganman.

— Tanishmasingizdan oldin Bobur Mansurov bilan uchrashishni orzu qilganmisiz?

— To‘g‘risi xayolimga ham kelmagan, chunki ularni Instagram’da kuzatmasdim, obuna bo‘lmagandim. Videolari chiqib qolsa, shunchaki tomoshabin sifatida tomosha qilardim.

— Bu insonga turmushga chiqishga qanday rozi bo‘ldingiz, qaysi xislati yoqdi?

— Turmush o‘rtog‘imni qisman taniysiz. Ulardek oqko‘ngil, samimiy, sodda inson san’at sohasida kam uchraydi. Umuman kibrga berilmaganlar. Har qanday holatda bir xil. Hurmat qiladigan va o‘rganishim kerak bo‘lgan xislatlari juda ko‘p. Allohning sinovlariga shukr qilgan, iymonli insonlar. Gapirsam gap ko‘p. Shuning uchun ko‘ngil qo‘yganman.

— Turmush o‘rtog‘ingiz bilan orangizda necha yosh farq bor?

— Yoshimiz orasidagi farq — 8 yil. Ular 1992-yilda tug‘ilganlar. Avvalo taqdir. Bir-birimizga ko‘ngil qo‘ydik. Dunyoqarashlarimiz to‘g‘ri keldi. Keyin ota-onamizning duosi va roziliklari bilan turmush qurdik. Ko‘pchilik ijtimoiy tarmoqlarda bir-biriga mos emas, unga boshqa qiz mos edi, deb yozganiga ko‘zim tushdi. Lekin shuni bilingki, kim kimni halol jufti bo‘lishi kerak ekanini, bir-biriga to‘g‘ri kelish-kelmasligini faqat Yaratgan egam va keyin o‘zimiz bilamiz.

— Turmush o‘rtog‘ingiz qizlar bilan vaynga tushsa, rashk qilmaysizmi?

— San’at sohasini yaxshi tushunaman, ularning kasblari shu. Rashk har bir tirik insonda bor. Lekin bizda me’yorida, deyarli yo‘q. Chunki ularning fe’l-atvorlarini yaxshi bilaman.

— Siz qaysi sohada o‘qigansiz?

— Yoshligimdan san’at sohasidaman. Yaqinda Konservatoriyani bitirdim. Hozirda o‘qituvchiman.

— Janjallashib qolgan paytlaringiz bo‘lganmi?

— Bir marta bo‘lgan, unashtirilganimizdan keyin. Lekin ular tez hazil qilib, kuldirib, yarashadilar.

— Alohida yashaysizlarmi?

— Shunga o‘xshash savollar ko‘p berilibdi. Xizmat qilyapsizmi, ish qila olasizmi, deyishibdi. Yana darrov Toshkentga ketib qoldingizmi, deb ham so‘rashibdi.

Men qishloqda, oddiy oilada tug‘ilganman. Allohga shukr har bir kelin qiladigan vazifalarni qo‘ldan kelgancha qilyapman. Alohida emasmiz, hali ketmadik. Qaynona, qaynotam bilan birgamiz.

Ma’lumot uchun, Bobur Mansurov va Farizaning to‘yi 20-noyabr kuni bo‘lib o‘tdi. Nikoh oqshomida o‘zbek shou-biznesining ko‘plab taniqli vakillari mehmon bo‘ldi.