Bugun, 7-oktyabr kuni Qurilish va uy-joy kommunal xo‘jaligi vazirligida bo‘lib o‘tgan yig‘ilishda vazir Sherzod Hidoyatov hududlarda aholi punktlarining bosh rejalariga amal qilishda boshqarmalar e’tiborsizlik qilayotganini aytib o‘tdi.
“Bu ko‘rsatkichlar hali tizimda ko‘p ishlarni isloh qilishimiz lozimligini anglatadi. Bugun qurilish sohasida raqamlashtirishni yanada kuchaytirish, sun’iy intellektni aynan nazorat tizimiga joriy etish yuzasidan katta loyihalarni boshlaganmiz. Sohaga doir har qanday jarayon raqamlashadi va aniqlangan qoidabuzarlik holatlariga ta’sirchan choralar ko‘riladi”, dedi Sherzod Hidoyatov.
Ta’kidlanishicha, prezidentning tegishli qaroriga asosan 154 ta shaharsozlik hujjatlari ishlab chiqilishi belgilangan bo‘lsa-da, bugunga qadar 147 tasi bajarilgan xolos. Xususan, Jizzax, Farg‘ona va Urganch shaharlari bosh rejasi haligacha yakunlanmagan.
Sentyabr oyida prezident raisligida bo‘lib o‘tgan yig‘ilishda viloyat hokimlariga yil yakunigacha kamida 10 tadan hududning “master reja”sini ishlab chiqish topshirilgan edi.
Mazkur yig‘ilishda ko‘p qavatli turar joy qurilishiga ruxsatnoma berilishi natijasida aholining murojaati kundan kunga ko‘payib borayotgani aytilgandi.
Izoh (0)