Saudiya Arabistoni valiahd shahzodasi Muhammad bin Salmon Qiddiya shahrining rejasi va brendini taqdim etdi, uning taxminiy qiymati 2,67 milliard dollarni tashkil qiladi, deb xabar bermoqda Arabinform.
Qiddiyaga sifatli sarmoya kiritish “Vision 2030” rejasining asosiy maqsadlaridan biri bo‘lib, u iqtisodiyotning daromad manbalarini diversifikatsiya qilishga qaratilgan.
Valiahd shahzoda yaqin kelajakda shahar ko‘ngilochar, sport va madaniyat sohasida dunyoning eng mashhur nuqtasiga aylanishi va iqtisodiyoti bo‘yicha dunyoning eng yirik shaharlari o‘ntaligiga kirishini ta’kidladi.
Qiddiya shahri Davlat investitsiya jamg‘armasining yirik loyihalaridan biri hisoblanadi.
Shahar 360 kvadrat kilometr maydonda yotadi hamda 60 000 ta binodan iborat bo‘ladi. Hududda 600 000 dan ortiq odamni yashashi, 325 000 dan ortiq ish o‘rni yaratilishi rejalashtirilgan.
Qiddiya har yili 48 million tashrif buyuruvchini jalb qilish va mamlakat yalpi ichki mahsulotini taxminan 36 milliard dollarga oshirishni rejalashtirmoqda.
Qiddiya shahri Saudiya Arabistoni poytaxti Ar-Riyodning g‘arbida, Tuvayq tog‘larining qoq markazida joylashgan bo‘lib, elektron o‘yinlar shtab-kvartirasi, avtosportga bag‘ishlangan zona va “Formula 1” poyga yo‘lini o‘z ichiga oladi.
Shuningdek, u ikkita golf maydonchasi, dunyodagi eng katta Olimpiya muzeyiga ega futbol shaharchasi, “Six Flags” ko‘ngilochar shaharchasi va akvaparkdan iborat bo‘ladi. Dastlabki obyektlar yaqin ikki yil ichida ochiladi.
Sentyabr oyida Al-Akariya ko‘chmas mulk kompaniyasi (65 foizi Saudiya davlat investitsiya fondiga tegishli) o‘zining sho‘ba korxonalaridan biriga 611 million dollarlik “Qiddiya” loyihasi doirasida infratuzilma ishlari paketi bo‘yicha shartnomalar topshirilganini e’lon qildi.
“Vision 2030” rejasi bilan Saudiya Arabistoni qirollik iqtisodiyotini neft sektoridan uzoqlashtirishga hamda Qiddiya, “Qizil dengiz”, “NEOM”, “Diriyah” va “Amala” kabi noneft sektorlarini rivojlantirishga yordam beradigan milliardlab dollarlik bir qancha yirik loyihalarga umid qilmoqda.
Qirollik ushbu shaharlar Saudiyaning yalpi ichki mahsuloti o‘sish sur’atini 50 foizga ko‘tarish, xususiy sektor ulushini 65 foizga oshirish va yalpi ichki mahsulotdagi to‘g‘ridan to‘g‘ri xorijiy investitsiyalar ulushini 5,7 foizga oshirishni o‘z ichiga olgan 2030-yilga mo‘ljallangan maqsadlarga hissa qo‘shishini ta’kidlamoqda.
Izoh (0)