Surxondaryo viloyatining Qumqo‘rg‘on tumanida joylashgan, qurilishi va qayta ta’mirlanishiga 16 milliard so‘mdan ortiq mablag‘ sarflangan ko‘prik yana muammoga duch keldi. Bu haqda jamoatchilikka viloyat Avtomobil yo‘llari bosh boshqarmasi axborot xizmati xabar berdi.
“Polvontosh” selgasi suv sathining tabiiy holatlar natijasida keskin pasayib ketishi sodir bo‘lmoqda. Bu o‘z navbatida suv oqimi tezligi oshib ketishiga hamda ko‘prikning mustahkamlangan kirish va chiqish, yon qiyalik qirg‘oqlariga zarar yetkazmoqda. Ko‘prikning oraliq qurilmasi tayanchlari uzunligi selga sathidan 15-20 metr chuqurlikda joylashganligi sababli, kelgusida kuchli suv-toshqin suvlari sodir bo‘lishi kuzatilsa faqat ko‘prik qirg‘oqlariga zarar yetkazishi mumkin, — deyiladi ko‘prikda muammo paydo bo‘lgani haqida jamoatchilikka xabar bergan viloyat Avtomobil yo‘llari bosh boshqarmasi axborot xizmati xabarida.
Boshqarma mazkur ko‘prikning 2020-yildagi qayta ta’mirlanishiga 9 milliard sarflangan demoqda. Biroq, “Daryo” jurnalistining mazkur ko‘prik haqidagi surishtiruvlari natijasida 2020-yilda ko‘prikning qayt ta’miriga 9,6 milliard so‘m sarflangani ma’lum bo‘lgandi.
Ushbu obyekt Surxondaryo viloyatining Qumqo‘rg‘on tumani hududidan o‘tuvchi umumiy foydalanishdagi davlat ahamiyatiga molik 4R105 Darband—Boysun—Elbayon avtomobil yo‘lining 76-kilometr qismida “Polvontosh” selgasi ustida qurilgan ko‘prik hisoblanadi. Mazkur ko‘prikni qurish uchun “Termiz avtoyo‘l loyiha” MCHJ loyihachi “Xo‘shboq Ali Angor” xususiy korxonasi bosh pudratchi etib belgilangan. Loyihachi tomonidan obyektning loyiha hujjatlari ishlab chiqilib, 2020-yil 26-iyun kuni ekspertiza xulosasi olingan. Shundan so‘ng, 24-avgust kuni buyurtmachi va bosh pudratchi o‘rtasida pudrat shartnomasi tuzilgan. Shartnoma qiymati 9 milliard so‘m bo‘lib, 2020-yilda bo‘nak va bajarilgan ishlar uchun 7,5 milliard so‘m, 2021-yilda esa 1,5 milliard so‘m mablag‘ moliyalashtirib berilgan. Pudratchi tomonidan 2020-yilda 7,5 milliard so‘m, 2021-yilda 1,5 milliard so‘mlik ishlar bajarilgan. Qurilish montaj ishlari to‘liq yakunlangach, 2021-yil 30-dekabr kuni ishchi komissiya dalolatnomasiga asosan obyekt foydalanishga topshirilgan, — deydi mas’ullar.
Holat Surxondaryo viloyati avtomobil yo‘llari Bosh boshqarmasi nazoratiga olinib, 2024-yil ajratiladigan byudjet mablag‘lari hisobidan obyektdagi nuqsonlar bartaraf etilishi bildirilgan.
“Daryo”da 2020-yilda e’lon qilingan maqolada Surxondaryo viloyatining Qumqo‘rg‘on tumanidagi “Ko‘ganli” mahallasida yashovchi aholi hududda 6,5 milliard so‘mga qurib bitkazilgan ko‘prik hech qancha vaqt xizmat ko‘rsatmay qulab tushganini, yangi qurilayotgan yo‘l ham xuddi shunday sifatsiz bajarilib yaroqsiz holga kelib qolishidan qo‘rqayotganini aytgandi.
Jurnalist bilan suhbatlashgan aholi vakillaridan biri “Mana shu ko‘prik 1 yil 7 oy deganda shunday avariya holatiga kelib qoldi. Holbuki, bu ko‘prikka 6,5 milliard so‘m sarflangandi. Ish sifatsiz bajarilgani uchun ko‘prikning ‘umri qisqa’ bo‘ldi. Biz yo‘limiz ham shunday sifatsiz ta’mirlanib, hech qancha vaqt o‘tmasdan yaroqsiz holga kelishidan qo‘rqyapmiz”, — degandi. Shundan so‘ng Surxondaryo viloyat hokimligi Qumqo‘rg‘on tumanidagi ko‘prik haqidagi maqolaga munosabat bildirib, sifatsiz ko‘prik qurgan quruvchi ishini dastlab jinoyat ishi ochishni rad etgan transport prokuraturasi o‘rganayotganini ma’lum qildi. Va ko‘prikning qayta ta’miri uchun 9 milliard so‘m sarflanishini ochiqlagandi.
“Daryo” jurnalisti Surxondaryo viloyati Avtomobil yo‘llari Bosh boshqarmasi axborot xizmati rahbari Rustam Noqulov bilan telefon orqali bog‘lanib, 16 milliard so‘mdan ortiq mablag‘ sarflangan ko‘prik muammosini bartaraf etish uchun byudjetdan taxminan yana qancha mablag‘ sarflanishiga aniqlik kiritishga urindi. Qolaversa, suhbatdoshga “ko‘prikning yana muammoga duch kelishi, aniqrog‘i sel suvlari sabab ko‘prik qirg‘oqlarining zararlanishi avvaldan hisobga olinmaganmi, oqibatlari haqida o‘ylanmaganmi?”, deya savol berdi. Suhbatdosh savollarni eshitgach, bunga mutaxassislar orqali aniqlik kiritib berishini aytgan bo‘lsa-da, hozirgacha bu haqda axborot bermadi.
Izoh (0)