Бугун, 7 октябрь куни Қурилиш ва уй-жой коммунал хўжалиги вазирлигида бўлиб ўтган йиғилишда вазир Шерзод Ҳидоятов ҳудудларда аҳоли пунктларининг бош режаларига амал қилишда бошқармалар эътиборсизлик қилаётганини айтиб ўтди.
“Бу кўрсаткичлар ҳали тизимда кўп ишларни ислоҳ қилишимиз лозимлигини англатади. Бугун қурилиш соҳасида рақамлаштиришни янада кучайтириш, сунъий интеллектни айнан назорат тизимига жорий этиш юзасидан катта лойиҳаларни бошлаганмиз. Соҳага доир ҳар қандай жараён рақамлашади ва аниқланган қоидабузарлик ҳолатларига таъсирчан чоралар кўрилади”, деди Шерзод Ҳидоятов.
Таъкидланишича, президентнинг тегишли қарорига асосан 154 та шаҳарсозлик ҳужжатлари ишлаб чиқилиши белгиланган бўлса-да, бугунга қадар 147 таси бажарилган холос. Хусусан, Жиззах, Фарғона ва Урганч шаҳарлари бош режаси ҳалигача якунланмаган.
Сентябрь ойида президент раислигида бўлиб ўтган йиғилишда вилоят ҳокимларига йил якунигача камида 10 тадан ҳудуднинг “мастер режа”сини ишлаб чиқиш топширилган эди.
Мазкур йиғилишда кўп қаватли турар жой қурилишига рухсатнома берилиши натижасида аҳолининг мурожаати кундан кунга кўпайиб бораётгани айтилганди.
Изоҳ (0)