Toshkent viloyati Toshkent tumanida joylashgan manzarali bog‘dorchilik va o‘rmon ilmiy-tajriba xo‘jaligi (xalq tilidagi “Dendropark”) hududida yashillik darajasi qisqarayotgani aniqlandi. Bu haqda Bosh prokuratura axborot xizmati maʼlum qildi.
Aytilishicha, tegishli idoralar bilan hamkorlikda “Dendropark” hududidagi o‘simliklar dunyosi ahvoli aerokosmik tahlil asosida o‘rganilgan.
“O‘tgan asrning 60-yillaridan boshlab mamlakatimiz hududiga moslashtirish va seleksiya qilish maqsadida ekilgan qimmatbaho navli noyob yong‘oq daraxtlari nobud qilinayotgani maʼlum bo‘ldi.
Xususan, o‘rganishda daraxtlarning parvarishiga mas’uliyatsizlik bilan yondashilgani oqibatida 103 tup yong‘oq daraxtining qurib qolishiga olib kelingani, shuningdek, 85 tup ko‘p yillik yong‘oq daraxti kesilib, ildizi bilan qo‘porib olingani aniqlandi”, — deyiladi prokuratura axborotida.
Qo‘shimcha qilinishicha, hududida turli fuqarolar va xo‘jalik yurituvchi subyektlar tomonidan manzarali bog‘dorchilik va o‘rmon sohasiga aloqasi bo‘lmagan xo‘jalik faoliyati olib borilayotgani, ko‘plab kapital qurilishlar amalga oshirilgani aniqlangan.
Mazkur qurilishlarning qonuniyligi va aerokosmik tahlil asosida boshqa daraxtlarning kesilish holatlari tegishli davlat idoralari mutaxassislari ishtirokida to‘liq va har tomonlama o‘rganilishi boshlangan.
Bosh prokuratura jamoatchilikdan yuqoridagi kabi qonun buzilishi holatlarini aniqlash va bartaraf etish borasida barcha tashabbuskorlar bilan hamkorlikka tayyorligini bildirgan.
Izoh (0)