Surxondaryo viloyati Boysun tumanidagi “Darband” mahallasida yashovchi Aradasher Safarov yo‘l qurilishi natijasida uyining devorlari yorilib ketayotgani, bunga masʼullar befarq qarayotgani haqida “Daryo”ga murojaat qildi.
Aradasher Safarovning aytishicha, 2021-yilda Bishkek—Toshkent—Elbayon—Dushanbe xalqaro yo‘lini qurish bo‘yicha loyihachilar kelib, uydan 20 metr uzoqlikda yo‘l tushishini aytilgan.
“Rossiyada ikki yil mardikorlik qilib, shu uyni qurgandim. Boshida uyingizga hech qanday zarar yetmaydi deyishgan edi. Keyinroq, 2023-yilning avgust oyida quruvchilar kelib, yo‘l qurishni boshlashdi. Yo‘l temiryo‘lga kesishib qolayotgani uchun yo‘lni temiryo‘lni tagidan olib o‘tishini aytishdi.
Uyimdan 8 metr uzoqlikda kavlashni boshlashdi. Hozir 14 metr chuqur qazishdi. Shu ishlar davomida kovlanayotgan joydan to uyimgacha bo‘lgan yer 3-4 santimetr, uyimni devorlari esa 1 santimetr yorilib ketdi” – dedi Aradasher Safarov.
Murojaatchi holatga oydinlik kiritish maqsadida Termiz shahrida joylashgan “Janubyo‘lloyiha” instituti direktori Abduqqahor Yo‘ldoshevga uchrashgan. Lekin tayinli javob ololmagan.
Uning alohida taʼkidlashicha, qurilish haqida hech kim ularni ogohlantirmagan.
“Tuproqning zichligi kam, uqalanib o‘pirilib ketmoqda. Qishloqda bunday muammo faqat bitta meni uyimda emas, yana 8 tacha xonadonda shu ahvol”, - dedi Aradasher Safarov.
Holat yuzasidan Boysun tumani hokimligi Aradasher Safarovning arizachiga yo‘llagan javob xatida holat o‘rganilgani aytilgan. Lekin hokim imzolagan xatda nima o‘rganilgani, qanday xulosa qilingani haqida gapirilmagan. Faqat xonadon va yo‘l orasida 13 metr masofa borligi zikr etilgan.
Fuqarolarning qayta-qayta murojaatidan keyin tuman Adliya bo‘limi masalani o‘rganib chiqib, tuman hokimiga xat yo‘llagan. Unda katta yo‘l kengayishi maqsadida ta‘mirlash ishlari olib borilayotganligi sababli, yashash xonadoniga zarar berayotganligini, shu bois davlat tomonidan kompensatsiya berilishi aytilgan.
Tuman hokimligi Adliya bo‘limi tomonidan yo‘llagan xatga javoban yetkazilgan zarar yuzasidan aniqlik kiritish maqsadida tegishli idoralarga ko‘rsatma berilgani qo‘shimcha qilingan.
“Daryo” voqealar rivojini kuzatib boradi.
Izoh (0)