“O‘zsanoatqurilishbank” ATB MIBdan qarzi bo‘la turib, mashina sotib olgan. Bu haqda “Revizor” Telegram kanalida e’lon qilindi.
“O‘zsanoatqurilishbank” Toshkent shahar mintaqaviy BXO tomonidan 220 mln so‘mga bir dona Chevrolet Onix Premier 2 Turbo AT avtomobilini xarid qilindi.
MIB ma’lumotlariga ko‘ra, “O‘zsanoatqurilishbank”ning 102,3 million so‘m qarzdorligi mavjud, — deyiladi xabarda.
Holat yuzasidan MIB axborot xizmati “Daryo”ga izoh berdi. Aytilishicha, qarzdor “O‘zsanoatqurilishbank” ATBdan undiruvchi davlat foydasiga 102 million 335 ming so‘m davlat boji undirish to‘g‘risidagi ijro hujjati byuroning Yunusobod tuman bo‘limi ish yurituviga 10-yanvar kuni kelib tushgan.
“Sud hujjatlari va boshqa organlar hujjatlarini ijro etish to‘g‘risida”gi qonunning 23-moddasiga asosan ijro ishi yuritishni qo‘zg‘atish to‘g‘risida qaror qabul qilinib, 10 kunlik ixtiyoriy muddat belgilangan.
Belgilangan ixtiyoriy muddatda qarzdorlik bartaraf etilmasa, ijro harakatlari davomida bankka tegishli bo‘lgan avtotransport vositalariga belgilangan tartibda taqiqlar o‘rnatiladi, — deyiladi MIB axborotida.
Byuroning qo‘shimcha qilishicha, bank tomonidan qarzdorlik ixtiyoriy muddatda bartaraf etilmasa, majburiy ijro harakatlariga kirishilib, qarzdorlikni undirish choralari ko‘riladi.
“O‘zsanoatqurilishbank” ATB axborot xizmatining “Daryo”ga ma’lum qilishicha, 9-yanvar kuni “Marg‘ilon Avto Savdo” MCHJ bilan “O‘zsanoatqurilishbank” ATBning Toshkent shahar mintaqaviy bank xizmatlari ofisi o‘rtasida avtomobil sotib olishga oid 3-268-202400017UZ-sonli shartnoma rasmiylashtirilgan va xarid.uzex.uz axborot portalida 21200102425901-lot raqami bilan joylashtirilgan.
“Biroq keyinchalik ushbu xarid obyekti bilan bog‘liq shartlar o‘zgargani sababli lot bekor qilingan.
Mazkur xarid bo‘yicha shartnoma rasmiylashtirilgan sana (2024-yil 9-yanvar)da esa, mib.uz saytida bankning soliq yoki boshqa shaxslar oldida hech qanday qarzdorligi mavjud bo‘lmagan”, — deyiladi bank axborotida.
Izoh (0)