Rossiya tomonidan 2024-yil boshida “Sibir kuchi-2” gaz quvuri qurilishi qoldirilishi mumkin. Bu haqda quvur hududi orqali o‘tishi kerak bo‘lgan Mo‘g‘uliston rahbariyatiga tayanib, Economic Times xabar berdi.
Mo‘g‘uliston bosh vaziri Luvsannamsrayn Oyuun-Erdene so‘zlariga ko‘ra, Rossiya va Xitoy haligacha loyihaning asosiy tafsilotlari bo‘yicha kelishib ulgurmagan va so‘nggi ikki yildagi rekord darajadagi global gaz narxi muzokaralarni murakkablashtirmoqda.
“Xitoy va Rossiya tomonlari hali ham hisob-kitoblar va baholar olib, iqtisodiy manfaatlar ustida ishlamoqda”, — dedi u.
Noyabr oyida The South China Morning Post gazetasi Xitoy Rossiyaga “Sibir kuchi 2” qurilishi uchun mustaqil to‘lovni taklif qilgani va gazga yangi chegirmalar talab qilgani haqida xabar bergandi. Nashrning yozishicha, Xitoy Rossiya uchun Yevropa bozorining o‘rnini bosishi kerak bo‘lgan gaz quvuriga sarmoya kiritmoqchi emas.
Rossiyaning Ukrainaga bostirib kirishi ortidan Yevropa bozorini boy bergan va eksportining yarmidan ko‘pini yo‘qotgan “Gazprom”ga Xitoy bilan yangi shartnoma juda zarur. 2023-yil Rossiya prezidenti Vladimir Putin Xitoy rahbari Si Szinpin bilan ikki marta uchrashib, uni Kreml 7 yildan ortiq ilgari surayotgan loyihaga rozi bo‘lishga ko‘ndirishga uringan, biroq ikki marta ham muzokaralar hech qanday natija bermagan.
Izoh (0)