Rossiya Mudofaa vazirligi 3-aprel kuni eʼlon qilgan hisobotda joriy yil boshidan beri urushda qatnashishni istagan 100 000 dan ortiq kishi shartnoma asosida armiya ro‘yxatiga olingani aytildi. Bu haqda “TASS” nashri batafsil xabar berdi.
Manbaga ko‘ra, 2024-yilning atigi uch oyi davomida jami 100 mingga yaqin fuqaro ro‘yxatga olingan. Safarbarlikka olish markazlarida jarayonlar faollashgan.
Rossiya mudofaa vazirligi joriy yil davomida jami 400 ming askar armiyaga jalb qilinishi haqida xabar bergan. Frontdagi vaziyat o‘zgarishiga qarab, chaqiriladiganlar soni ham o‘zgarishi mumkin.
Oldinroq Rossiya hukumati Crocus City Hallʼga hujum ortidan armiyaga ketishni istaydiganlar soni keskin oshganini maʼlum qilgan edi. Mudofaa vazirligiga ko‘ra, so‘nggi 10 kun ichida 16 mingga yaqin odam urushda qatnashish uchun shartnoma imzolagan. Har kuni mamlakat bo‘ylab 1700 nafargacha odam harbiy xizmatga yollanish uchun saralash punktlariga kelmoqda.
Crocusʼdagi terakt
Moskva viloyati Crocus City Hallʼdagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 143 kishi halok bo‘lgan, yuzlab odamlar jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini maʼlum qilgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq eʼtibor qaratishga chaqirgan.
O‘z navbatida, Rossiya tergovchilari terakt ishtirokchilarining oilasini so‘roq qilish uchun Tojikistonga borgan. Shundan keyin Vahdat shahrida yashovchi to‘qqiz nafar tojikistonlik Crocusʼdagi terakt ijrochilari bilan aloqadorlikda ayblanib, qo‘lga olingan. Hibsga olinganlar ISHID bilan aloqada bo‘lganlikda ham gumon qilinmoqda.
Dog‘istonda ham aksilterror operatsiya o‘tkazilib, to‘rt nafar Tojikiston fuqarosi ushlangan. Ular teraktning asosiy ishtirokchilarini qurol va pul bilan taʼminlagani aytilmoqda. Rossiya Tashqi ishlar vazirligi Ukraina hukumatini rasman Crocus City Hallʼdagi teraktda ayblagan. Ukraina rasman mazkur ayblovlarni rad etgan. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor taʼkidlagan.
Izoh (0)