Moskvada Crocus City Hall’dagi teraktdan keyin hibsga olingan chechenistonlik Asxab Uspanov vafot etdi. Bu haqda Deutsche Welle xabar berdi.
Ma’lum qilinishicha, Asxab Uspanov teraktdan keyingi kechada, bir necha soatdan keyin politsiya bo‘limida o‘lgan. Ma’lumotni uning onasi Taisa Uspanova tasdiqlagan. Uspanovning o‘limi haqida uch kun avval Chechenistonning muxolifatdagi 1ADAT Telegram kanali ham xabar bergandi.
Taisa Uspanovaning so‘zlariga ko‘ra, uning o‘g‘li turmush o‘rtog‘ining ishxonasiga ketayotganida qo‘lga olingan. Ayol bu qayerda sodir bo‘lganiga aniqlik kiritmadi. Hibsga olinganidan so‘ng Uspanov xotiniga qo‘ng‘iroq qilgan: ayol uning oldiga kelmoqchi bo‘lgan, lekin u kelmaslikni so‘ragan.
Erkak politsiyaning unga qarshi “hech qanday ayblovi yo‘qligini aytgan, lekin keyinroq rafiqasiga qaytib qo‘ng‘iroq qilib, “xavfsizlik kuchlariga qo‘pollik qilganini” aytgan va undan politsiya bo‘limiga kelishni so‘ragan.
Uspanovning rafiqasi, onasi aytganidek, ikki soatdan keyin politsiyaga kelgan. U yerda ayolga “eri endi yo‘qligini aytishgan. Marhumning onasi o‘g‘li Chechenistonda dafn etilganini aytmoqda, biroq jasad unga qanday va qachon berilgani, unda qiynoq izlari bor-yo‘qligi va o‘lim sababi haqida hech narsa ma’lum emas. Taisa Uspanova o‘g‘li teraktga aloqador bo‘lishi mumkin emasligini ta’kidlamoqda.
“Agenstvo” Uspanovning qurilish sohasida yakka tartibdagi tadbirkor sifatida ro‘yxatdan o‘tganini aniqladi. “SPARK” maʼlumotlar bazasida uning yakka tartibdagi tadbirkorligi 22-mart kuni vafot etgani sababli tugatilgani keltirilgan.
1ADAT: Uspanov qiynoqqa solingan
1ADAT Telegram kanaliga ko‘ra, Uspanov ishdan keyin uyiga qaytayotganida avtobus bekatida niqobli odamlar tomonidan hujumga uchragan. Gumondor ular xavfsizlik kuchlari ekanini tushunmay, “qarshilik qilgan”.
Telegram kanalining taʼkidlashicha, so‘roq paytida xavfsizlik kuchlari erkakning qovurg‘alari va umurtqa pog‘onasini sindirgan, shuningdek, bo‘g‘ilish izlari va tanada keng tarqalgan ko‘karishlar bo‘lgan.
1ADAT shuningdek, Uspanovning jasadi outopsiyadan keyin tasvirlangan videoni ham e’lon qildi. Video ortidagi ovozli xabarga ko‘ra, xavfsizlik kuchlari “jinoyatini yashirish” uchun Uspanov o‘zini osish orqali joniga qasd qilgan ssenariyni uyushtirishgan. Uspanovning onasi “Agenstvo”ga o‘g‘li musulmon bo‘lgani uchun o‘z joniga qasd qila olmasligini aytgan.
Crocus’dagi terakt
Moskva viloyatidagi Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 143 kishi halok bo‘lgan, yuzlab odamlar jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini ma’lum qilgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq e’tibor qaratishga chaqirgan.
O‘z navbatida, Rossiya tergovchilari terakt ishtirokchilarining oilasini so‘roq qilish uchun Tojikistonga borgan. Shundan keyin Vahdat shahrida yashovchi to‘qqiz nafar tojikistonlik Crocus’dagi terakt ijrochilari bilan aloqasi borlikda ayblanib, qo‘lga olingan. Hibsga olinganlar ISHID bilan aloqada bo‘lganlikda ham gumon qilinmoqda.
Dog‘istonda ham aksillterror operatsiya o‘tkazilib, to‘rt nafar Tojikiston fuqarosi ushlangan. Ular teraktning asosiy ishtirokchilarini qurol va pul bilan ta’minlagani aytilmoqda. Rossiya Tashqi ishlar vazirligi Ukraina hukumatini rasman Crocus City Hall’dagi teraktda ayblagan. Ukraina rasman mazkur ayblovlarni rad etgan. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor ta’kidlagan.
Izoh (0)