Tojikiston prezidenti Emomali Rahmon Moskvadagi Crocus City Hall’da sodir etilgan teraktni “sharmandali va dahshatli” voqea deb atadi. Bu haqda respublika rahbari saytida xabar berildi.
“Moskva yaqinida sodir bo‘lgan sharmandali va dahshatli voqea har birimizni, ayniqsa, ota-onalarni farzand tarbiyasiga yanada jiddiyroq e‘tibor qaratish haqida yana bir bor ogohlantirmoqda. Yana bir bor ta’kidlaymanki, biz o‘smirlar va yoshlarni ana shunday buzg‘unchi, vahimali guruh va harakatlar ta’siridan asrashimiz, farzandlarimiz tojik millatiga, tojiklarning suveren davlatiga, ularning ota-onalarining ezgu nomiga dog‘ tushirishiga yo‘l qo‘ymasligimiz kerak”, – dedi Emomali Rahmon.
24-mart kuni Tojikiston prezidenti rossiyalik hamkasbi Vladimir Putin bilan telefon orqali muloqot qilgandi. U terror hujumida halok bo‘lganlarning oila a’zolari va yaqinlariga hamdardlik va ta’ziya bildirgan.
Emomali Rahmon Crocus City Hall majmuasida sodir etilgan shafqatsiz, qonli terrorchilik harakatini keskin qoralar ekan, “terrorchilarning millati, vatani, dini yo‘q” ekanini ta’kidlagan.
- Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 137 kishi halok bo‘lgan, 182 kishi jarohatlangan. Hujumni sodir etishga Tojikistonning to‘rt nafar fuqarosi ayblangan, ular aybiga iqror bo‘lgan.
- Mazkur holatdan keyin Rossiyada migrantlarga nisbatan munosabat o‘zgargan, Rossiyaga kirish va chiqishni tekshirish jarayoni kuchaydi. Holat yuzasidan Qirg‘iziston Tashqi ishlar vaziriligi zarurat bo‘lmasa, Rossiyaga tashrif buyurmaslikni tavsiya qildi.
Izoh (0)