Moskva viloyatidagi Crocus City Hall’da terakt uyushtirishda gumon qilingan yana bir tojikistonlik — Yoqubjoni Yusufzoda hibsga olindi. Bu haqda “Kommersant” xabar berdi. Moskvaning Basmanniy tuman sudi 25 yoshli Yusufzodani terakt ishtirokchilariga yordam berishda ayblab, ikki oyga hibsga oldi.
Tojikiston fuqarosi terakt uyushtirishda ayblanayotgan shaxsga ijaraga olgan kvartira uchun pul to‘lashda yordam bergani aytilmoqda.
Yana kamida besh kishining jinoyat sodir etgan shaxslarga aloqadorligi tekshirilmoqda. Ulardan to‘rt nafari Dog‘istondan olib kelingan. Mazkur shaxslar terakt ishtirokchilarini qurol, o‘q-dori va pul bilan ta’minlagani gumon qilinmoqda, yana bir nafari Yusufzoda bilan birga qo‘lga olinib, militsiyaga bo‘ysunmagani uchun maʼmuriy javobgarlikka tortilgan.
Sud teraktda (Jinoyat kodeksining 205-moddasi 3-qismi bilan) ayblangan Yoqubjoni Yusufzodani hibsga olish masalasini yopiq eshiklar ortida ko‘rgan. Sudning ochiq qismida jurnalistlar faqat Tojikiston fuqarosining shaxsiy ma’lumotlarini eshitgan. Jumladan, u 25 yoshda ekani, uch nafar yosh farzandini tarbiyalayotgani, qurilishda noqonuniy jismoniy mehnat qilgani ma’lum bo‘lgan.
Shunga qaramay, ayblanuvchi 22-mart kuni Crocus’da sodir etilgan teraktda ayblanayotgan tanishi Fariduni Shamsidinga oz miqdorda pul yuborgan. Ikkinchisi bu va boshqa pullarni Krasnogorskda kvartirani ijaraga olish uchun ishlatgan.
Yusufzoda 25-mart kuni do‘sti Inoyatullo Kendjayev bilan qurilishdan qaytayotganida qo‘lga olingan. Bu vaqtda poytaxt politsiyasi Crocus’dagi terakt sababli “Nolegal” operatsiyasini o‘tkazgan va uning doirasida tojikistonliklarni tekshirishga qaror qilgan.
Biroq ayblanuvchilar patrul mashinasini ko‘rgach, “harakat trayektoriyasini o‘zgartira boshlagan”, qadamlarini tezlashtirgan va militsiya xodimlarining to‘xtash haqidagi talablarini eshitib, qochishga uringan.
“Qo‘lga olish chog‘ida ikkalasi ham faol qarshilik ko‘rsatgan, shaxsini tasdiqlovchi hujjatlarni taqdim etishdan bosh tortgan, shuningdek, politsiya xodimlarining xizmat avtomashinalariga chiqish talabini bajarmagan”, — deydi huquq-tartibot xodimlari.
Itoatsizlik uchun (Rossiya Ma’muriy javobgarlik to‘g‘risidagi kodeksining 19.3-moddasi 1-qismi bilan) ikkalasi ham Presnenskiy tuman sudi tomonidan hibsga olingan: Yusufzoda - 12 sutkaga va uning hali ham tekshirilayotgan do‘sti 15 sutkaga.
Dog‘istonda ham Tojikiston fuqarolari qo‘lga olindi
Federal xavfsizlik xizmati Maxachqal’a va Kaspiyskda o‘tkazilgan aksilterror operatsiyasi chog‘ida hibsga olingan tojikistonlik to‘rt kishi terakt ishi bo‘yicha ayblanayotganini ma’lum qildi.
“Men ularga, Moskvadagi Crocus City Hall’ga hujum qilgan yigitlarga qurol tashidim. Maxachqal’adan Mytishchigacha. Ularga faqat moliyaviy va qurol-yarog‘ bilan yordam ko‘rsatdim”, — deydi hibsga olinganlardan biri so‘roq paytida.
Tegishli videoyozuv FXX tomonidan tarqatilgan.
Teraktda ayblanayotganlar hujumdan biroz oldin Renault avtomashinasida qurol sotib olish uchun Mytishchi shahriga borgan. Ularning harakati uylardan biriga o‘rnatilgan videokamera tomonidan yozib olingan.
Shu bilan birga, Dog‘istonda qo‘lga olingan shaxs tintuv chog‘ida uning xonadonidan ikkita Kalashnikov avtomati va 460 dona o‘q-dori topilgani va pullar telefonga ulangan kartaga o‘tkazilganini tasdiqladi.
FXX “Dog‘istonda qo‘lga olingan, terrorchilik guruhining bir qismi bo‘lgan to‘rt nafar chet el fuqarosi Moskvadagi Crocus City Hall konsert zalida sodir etilgan teraktni amalga oshiruvchilarni moliyalashtirish va terror vositalari bilan taʼminlashda bevosita ishtirok etgan, shuningdek, Kaspiyskdagi ommaviy yig‘ilish joylarida terakt tayyorlangan”ini ma’lum qildi.
“Bomba G‘alaba bog‘ida yoki Kaspiysk qirg‘og‘ida portlatilishi, shundan keyin ular Rossiyani tark etishi kerak edi”, — deyiladi ayblovda.
“Kommersant”ning huquq-tartibot idoralaridagi manbasiga aniqlik kiritishicha, xavfsizlik kuchlari Kaspiyskdagi ikkita va Maxachqal’adagi uchta manzilda operatsiya o‘tkazgan. Hibsga olingan to‘rt kishining barchasi Tojikiston fuqarolari. Ulardan kamida bittasi so‘roq paytida Muhammadni (Crocus terakti aybdorlaridan biri Muhammadsobir Fayzov) bilishini tasdiqladi.
Chet elliklar Dog‘istonda kafel teruvchi bo‘lib ishlagan. Tergovning hibsga olinganlarga nisbatan ehtiyot chorasini tanlash haqidagi iltimoslari katta ehtimol bilan Basmanniy tuman sudida ko‘rib chiqiladi.
Izoh (0)