Rossiya Mudofaa vazirligi Crocus’dagi teraktdan keyin mamlakatda shartnoma bo‘yicha harbiy xizmat o‘tashni xohlovchilar soni sezilarli darajada oshganini ma’lum qildi.
Mudofaa vazirligiga ko‘ra, so‘nggi 10 kun ichida 16 mingga yaqin odam urushda qatnashish uchun shartnoma imzolagan. Har kuni mamlakat bo‘ylab 1700 nafargacha odam harbiy xizmatga yollanish uchun saralash punktlariga keladi.
“O‘tgan hafta davomida Rossiya shaharlaridagi saralash punktlarida o‘tkazilgan suhbatlar chog‘ida nomzodlarning aksariyati shartnoma tuzishning asosiy sababi sifatida 2024-yil 22-mart kuni Moskva viloyatida sodir bo‘lgan fojiada halok bo‘lganlar uchun qasos olish istagini ko‘rsatdi”, — deydi vazirlik.
Crocus’dagi terakt
Moskva viloyati Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 143 kishi halok bo‘lgan, yuzlab odamlar jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini ma’lum qilgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq e’tibor qaratishga chaqirgan.
O‘z navbatida, Rossiya tergovchilari terakt ishtirokchilarining oilasini so‘roq qilish uchun Tojikistonga borgan. Shundan keyin Vahdat shahrida yashovchi to‘qqiz nafar tojikistonlik Crocus’dagi terakt ijrochilari bilan aloqadorlikda ayblanib, qo‘lga olingan. Hibsga olinganlar ISHID bilan aloqada bo‘lganlikda ham gumon qilinmoqda.
Dog‘istonda ham aksilterror operatsiya o‘tkazilib, to‘rt nafar Tojikiston fuqarosi ushlangan. Ular teraktning asosiy ishtirokchilarini qurol va pul bilan ta’minlagani aytilmoqda. Rossiya Tashqi ishlar vazirligi Ukraina hukumatini rasman Crocus City Hall’dagi teraktda ayblagan. Ukraina rasman mazkur ayblovlarni rad etgan. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor ta’kidlagan.
Izoh (0)