10-iyul kuni Markaziy saylov komissiyasi matbuot markazida bo‘lib o‘tgan matbuot anjumanida O‘zbekiston prezidenti saylovining dastlabki natijalari e’lon qilindi.
O‘zbekistonda muddatidan ilgari prezident saylovi 2023-yil 9-iyul kuni bo‘lib o‘tdi. Mamlakat bo‘ylab ochilgan 10 mingdan ortiq saylov uchastkalari soat 8:00 dan soat 20:00 ga qadar saylovchilarni qabul qildi. Markaziy saylov komissiyasi bergan ma’lumotga ko‘ra, saylovda jami ro‘yxatga olingan saylovchining 15,6 million nafari, ya’ni saylovchilarning 79,8 foizi ovoz berdi. Saylov kodeksining 96-moddasiga muvofiq, agar saylovchilar ro‘yxatiga kiritilgan fuqarolarning 33 foizi ovoz berishda ishtirok etgan bo‘lsa saylov o‘tgan hisoblanadi.
Prezident saylovining dastlabki natijalariga ko‘ra:
Abdushukur Hamzayev (Ekologik partiya) — 3,74 foiz;
Ulug‘bek Inoyatov (XDP) — 4,02 foiz;
Robaxon Mahmudova (“Adolat”) — 4,43 foiz;
Shavkat Mirziyoyev (O‘zLiDeP) — 87,05 foiz ovoz to‘plagan.
Saylovchilarning 87 foizdan ortiq ovozini olgani uchun Shavkat Mirziyoyev 7 yil muddatga O‘zbekiston prezidenti etib qayta saylandi.
Muddatidan ilgari O‘zbekiston prezidenti saylovi
30-aprelda bo‘lib o‘tgan referendum natijalariga ko‘ra, O‘zbekiston Konstitutsiyasi yangi tahrirda qabul qilindi. Yangilangan Konstitutsiya davlat hokimiyati oldiga yangi siyosiy, ijtimoiy-iqtisodiy vazifalarni qo‘ydi. Shu bois davlat rahbari Konstitutsiyaning 128-moddasiga muvofiq, muddatidan ilgari prezident saylovi o‘tkazish haqida xalqqa murojaat qildi. Bu tashabbus Oliy Majlis palatalari, siyosiy partiyalar hamda jamoatchilik faollari tomonidan qo‘llab-quvvatlandi.
6-may kuni Saylov kodeksiga kiritilgan o‘zgartirishlarga ko‘ra prezident muddatidan ilgari O‘zbekiston prezidenti saylovini tayinlagan taqdirda, saylov ushbu kodeksga to‘liq muvofiq holda 2 oy ichida o‘tkaziladi. Bunda saylovga tayyorgarlik ko‘rish hamda uni o‘tkazishga doir tadbirlarni amalga oshirish muddatlari Markaziy saylov komissiyasi tomonidan belgilanadi. Prezidentlikka nomzodlarning saylovoldi tashviqoti 7-iyundan boshlandi. O‘zbekiston prezidenti saylovida ishtirok etayotgan har bir nomzodga targ‘ibot tadbirlari uchun 4 milliard 914 million so‘m ajratilgan.
Shavkat Mirziyoyev haqida
Shavkat Mirziyoyev 1957-yil 24-iyulda Jizzax viloyatining Zomin tumanida shifokor oilasida tug‘ilgan. Millati — o‘zbek. Ma’lumoti — oliy. 1981-yilda Toshkent irrigatsiya va qishloq xo‘jaligini mexanizatsiyalash muhandislari institutini tamomlagan. Ixtisosligi — muhandis-mexanik. Texnika fanlari nomzodi, dotsent.
1981-yilda Toshkent irrigatsiya va qishloq xo‘jaligini mexanizatsiyalash muhandislari institutida kichik ilmiy xodimlikdan boshlab, katta o‘qituvchi, dotsent, o‘quv ishlari bo‘yicha prorektor lavozimlarida ishlagan. 1990-yilda Respublika Oliy Soveti deputati etib saylanib, Mandat komissiyasining raisi sifatida faoliyat yuritgan.
1992-yilda Toshkent shahrining Mirzo Ulug‘bek tumani hokimi, 1996—2001-yillarda Jizzax viloyati hokimi, 2001—2003-yillarda Samarqand viloyati hokimi lavozimlarida xizmat qilgan. Ijro hokimiyatidagi faoliyati bilan bir paytda 1995—2003-yillarda Oliy Majlis deputati sifatida qonunchilik jarayonida ham ishtirok etgan.
Shavkat Mirziyoyev 2003-yilda O‘zbekiston bosh vaziri etib tasdiqlanib, 2016-yilga qadar faoliyat yuritgan. 2016-yil 4-dekabr kuni bo‘lib o‘tgan Prezident saylovi yakunlari bo‘yicha saylovchilarning 88,61 foiz ovozi bilan O‘zbekiston prezidenti etib saylangan. 2021-yil 24-oktabr kuni bo‘lib o‘tgan prezident saylovida 80,1 foiz ovoz bilan O‘zbekiston prezidenti etib qayta saylangan. “Mehnat shuhrati” va “Fidokorona xizmatlari uchun” ordenlari bilan taqdirlangan.
Izoh (0)